DILI, 24 Jullu 2026 (TATOLI)-Autoridade Munisipál Dili (AMD) alerta ba operadór ekonómiku sira atu halo limpeza iha área negósiu, bainhira la kumpre maka sei aplika multa.
AMD fó sai sirkulár númeru 002/PAM Dili/VII/2026, iha 23 Jullu 2026, hato’o ba loja, empreza no estabelesimentu komersiál sira hotu iha Dili ho asuntu orden obrigatóriu atu halo limpeza iha areadór negósiu.
lha ezersísiu kompeténsia neʼebé atribui ba AMD tuir Dekretu-lei númeru 33/2008, loron 27 fulan-Agostu, neʼebé altera husi-Dekretu-lei n.º 3/2024, loron 17 fulan-Janeiru, AMD determina katak, loja, empreza no estabelesimentu komérsiál hothotu tenke halo limpeza diária iha areadór negósiu (paseiu, área estasionamentu no entrada asesu públiku).
“Limpeza tenke halo antes loke no taka atividade negósiu sira, atu garante laiha rezíduu sólidu ka materiál seluk neʼebé estraga ijiene no imajen sidade”, refere karta AMD ne’ebé Tatoli, asesu ohin.
Tuir karta ne’e, ema ka entidade responsavel sira ne’ebé la kumpre ka la implementa determinasaun sira ne’ebé hakerek iha orden ida-ne’e sei konsidera hanesan violasaun ba dispozisaun legál sira iha dekretu-lei ne’e no sei lori ba prosedimentu husi AMD ho implementasaun koima administrativa no medida korretiva tuir artigu 5.°, 6.°, 8.° 9.º, 10.° Dekretu-lei n.º 3/2024, loron 17 Janeiru, kona-ba Ijiene no Orden Públika.
Montante koima administrativa iha Dekretu-lei ne’e baze legál ba koima administrativa hatuur klaramente hanesan ema individuál (pessoa singular): $5 to’o $500, ema koletiva/ entidade (pessoa koletiva) $10 to’o $ 1.000.
Montante ne’e depende ba tipu no gravidade violasaun neʼebé akontese
sinseramente.
“Medida ida-ne’e ho objetivu atu proteje ijiene públiku no imajen di’ak ba kapitál, tanba ne’e obrigatóriu ba ajente ekonómiku hothotu. Autoridade husu kooperasaun no kolaborasaun parte hotu nian”, karta ne’e hateten.
Jornalista: Nelson de Sousa
Editora: Maria Auxiliadora
