OEKUSI, 24 Jullu 2026 (TATOLI) – Prezidente Asosiasaun Portugés ba Edukasaun Ambientál (ASPEA) no Koordenadór Rede Luzofonia ba Edukasaun Ambientál (Redeluso), Joaquim Ramos Pinto, halo vizita dahuluk ba monumentu Lifau, dalan krús, otél Lifau, inklui rezidénsia Fulolo, hodi observa kondisaun mínima ba preparasaun Kongresu Internasionál ba dala-IX kona-ba Edukasaun Ambientál husi Komunidade Paíz Lian Portugés (CPLP) ne’ebé tuir planu sei realiza iha loron 26 to’o 30 Jullu 2027.
Durante vizita avaliasaun ne’e, nia hetan akompañamentu husi Prezidente Komisaun Nasionál ba Kongresu Internasionál Edukasaun Ambientál, Virgílio Smith, hamutuk ho ekipa husi Sentru Edukasaun Informasaun Ambientál (CEIA) no Ministériu Turizmu Ambientál (MTA), inklui Autoridade RAEOA.
“Loron dahuluk ohin, ita vizita otél Lifau atu haree nia kondisaun no ambiente inklui kondisaun sira, atu prepara ba kongresu ne’e, tanba otél ne’e maka sei fatin ba kongresu Edukasaun Ambiental husi Komunidade País Lian Portugés,” Prezidente Autoridade RAEOA esplika perante vizita dahuluk iha Lifau, ohin.
Hafoin vizita otél Lifau, Prezidente Autoridade RAEOA konvida kedas ekipa komisaun kontinua vizita monumentu Lifau hodi observa ambiente monumentu Lifau no kontinua kedas vizita dalan krús Lifau nian.
Iha biban ne’e, Autoridade Másimu Oekusi esplika ba komisaun sira katak Lifau nu’udar fatin dahuluk xegada sidadaun portugés sira iha tinan-500 liubá:“Fatin maka ne’e, istória Timor-Leste, hahú husi fatin ne’e, depois maka ba nasionál.”
Hafoin ramata vizita ne’e, ekipa kontinua kedas ba rezidénsia Fulolo, nu’udar fatin deskansa ba kongresista sira bainhira partisipa iha Kongresu Internasionál ba dala-IX kona-ba Edukasaun Ambientál husi Komunidade Paíz Lian Portugés (CPLP) nian.
“Parte lorokraik sei kontinua tan ba gruta Fatusuba, nu’udar fatin turízmu relijiozu ne’ebé koñesidu dezde tempu Portugés. Atividade seluk sei kontinua iha loron sábadu ba vizita sub-rejiaun sira no suku,” nia esplika iha momentu vizita ne’e.
Jornalista: Abílio Elo Nini
Editór: Rafael Ximenes de A. Belo
