DILI, 24 Jullu 2026 (TATOLI)–Ministru Defeza, Kontra Almirante Donaciano do Rosário da Costa Gomes ‘Pedro Klamar Fuik’, Sesta (24/07) ne’e, hamutuk ho nia omólogu Ministru Defeza Nasionál Portugal ofisialmente asina nota entedimentu ba kuadru kooperasaun iha domíniu defeza.
Akordu kooperasaun ho Portugal foku liu ba kapasitasaun iha Timor-Leste hodi reforsa parseiru estratéjiku entre nasaun rua ne’e iha Lisboa, Portugal.
Asinatura ba dokumentu rua ne’e reprezenta pasu foun ida ba reforsu kooperasaun bilaterál, ne’ebé bazeia ba konfiansa, solidariedade no respeitu mútua, no kontribui ba dezenvolvimentu Forsa Defeza Timor-Leste (F-FDTL) no ba konsolidasaun soberania nasionál.
Notísia relevante : Ministru Defeza aprezenta projetu konstrusaun Ospitál Militár F-FDTL ba Konsellu Ministru
Durante nia diskursu, Ministru Defeza Timor-Leste hateten katak relasaun entre Portugal no Timor-Leste fundamenta ba ligasaun istóriku, kulturál no linguístiku ne’ebé kle’an, nune’e mós ba partilla valór demokrátiku no vizaun komún atu promove dame, estabilidade no dezenvolvimentu.
“Programa-Kuadru Kooperasaun foun ne’e estabelese vizaun estratéjika ba tinan sira tuir mai, inklui reforsu ba kapasidade institusionál Defeza Timor, liuliu liuhusi transformasaun ba Institutu Defeza Nasionál, kapasitasaun ba Akademia Militár no reforsu ba Ospitál Militár, área sira ne’ebé IX Governu Konstitusionál konsidera hanesan prioridade,” Ministru Klamar Fuik hateten iha nia diskursu iha ámbitu serimónia asina kuadru kooperasaun ho iha domíniu defeza ho Portugal, ne’ebé Ajénsia TATOLI asesu, Sesta ne’e.
Iha biban ne’e mós, Ministru Defeza Nasionál Portugal, Nuno Melo, fó onra ba Ministru Defeza Repúblika Demokrátika Timor-Leste, Kontra Almirante Donaciano da Costa Gomes, ho Medalla Defeza Nasionál Klase 1, hanesan rekoñesimentu ba nia kontribuisaun ba aprofundamentu kooperasaun entre nasaun rua iha domíniu defeza.
Jornalista : Natalino Costa
Editora : Julia Chatarina
