BAUKAU, 24 Jullu 2026 (TATOLI)—Governu liuhusi Ministériu Solidariedade Sosiál no Inkluzaun (MSSI) apoia konstrusaun uma ba benefisiáriu iha Postu Administrativu Matebian, Munisípiu Baukau.
Ministra Solidariedade Sosiál no Inkluzaun (MSSI), Verónica da Dores, esplika apoia referida nu’udár parte obrigasaun husi Governu ba família vulneravel sira iha-ne’ebé serbisu hamutuk ho autoridade munisipál, postu no suku liuhusi identifikasaun ba grupu benefisiáriu sira tanba satan netik loron, udan no anin.
“Maski simples maibé nia durasaun tenke tempu naruk uitoan, sosiál la’ós halo uma maibé apoia de’it ba grupu vulneravel atu hela ba,” Ministra Solidariedade Sosiál no Inkluzaun hateten iha Samarogo, Suku Maluru, ne’ebé TATOLI asesu, Kinta ne’e.
Governante ne’e relata ajudu referidu hanaran apoia pontuál ho valór orsamentu husi $120 to’o rihun $2 bazeia ba kritéria ne’ebé establese husi MSSI hanesan nesesidade bázika.
Aleinde ne’e, ajuda ne’ebé iha kompleta ho ekipamentu hanesan kama, kadera no meza iha-ne’ebé bele hakmaan benefisiáriu sira liuliu fasilita uma-laran.
Iha fatin hanesan, benefisiáriu Tomás Siqueira hato’o agradesimentu tanba apoia ne’ebé fó husi MSSI fasilita ona uma ne’ebé seguru bainhira kompara ho anteriór ne’ebé menus kondisaun.
“Ha’u kontente tanba Governu apoia halo uma to’o ramata,” Tomás informa.
Entretantu, Governu liuhusi MSSI ajuda konstrui uma ba komunidade vulneravel iha Baukau hamutuk uma-lima ne’ebé lokaliza iha Postu Administrativu Matebian iha-ne’ebé kada uma ho medida 6x6m² kompostu husi kuarta rua, sala vizita no han, varanda inklui koziña no saneamentu ho totál orsamentu ba uma-lima hamutuk rihun $10.
Jornalista: Natalino Belo
Editór: Xisto Freitas da Piedade
