DILI, 24 Jullu 2026 (TATOLI)–Selesaun Nasionál Timor-Leste hala’o ona nia treinamentu ofisiál iha Chonburi Stadium, Tailándia, hodi prepara-an ba jogu dahuluk iha Hyundai Cup 2026 – Grupu A kontra Vietname.
Tuir informasaun ne’ebé Federasaun Futebol Timor-Leste (FFTL) fó sai katak treinamentu ne’e hanesan parte ikus ba preparasaun ekipa Lafaek molok tama ba kompetisaun ofisiál.
Iha sesaun treinu ne’e jogadór no korpu tékniku hotu hatudu foku no prontu atu fó esforsu másimu.
Timor-Leste sei hahú nia kampaña iha Hyundai Cup 2026 iha Grupu A ho adversáriu boot hanesan Vietname. Jogu ne’e sai teste dahuluk ba selesaun atu prova sira-nia preparasaun iha torneiu nivel ASEAN nian.
Kapitaun ekipa Anizio Correia hateten ba TATOLI liuhusi WhatApp hateten katak ekipa selesaun nasionál Timor-Leste prontu no halo preparasaun másimu atu enfrenta jogu ne’e.
“Ami preparadu, minutu 90 iha kampu laran mak termina, ami sei esforsu atu manán, karik lakon ho dignidade,” Anizio hateten.
Tuir oráriu ne’ebé iha Timor-Leste sei kontra Vietname iha orsida kalan tuku 10h00 iha Tailándia.
Jornalista : Hortêncio Sanchez
Editór : Cancio Ximenes
