Autoridade lokál Fatuhada husu MAE muda sede suku tanba fatin kloot
DÍLI, 27 Jullu 2026 (TATOLI) – Xefe Suku Fatuhada, Marcelino Soares, husu ba Governu, liuhosi Ministériu Administrasaun Estatal (MAE), atu muda Sede Suku Fatuhada tanba edifísiu atual ki’ik no la iha espasu sufisiente atu atende komunidade no fasilita servisu administrativu.
Marcelino dehan katak sede suku ne’ebé uza hela agora mos uza hanesan klinika. Situasaun ida-ne’e halo komunidade ne’ebé mai buka atendimentu saúde no trata dokumentu administrativu hasoru difikuldade tanba espasu limitadu, inklui fatin atu para kareta no motorizada.
“Lori komunidade nia naran, hau husu ba Governu liuhosi MAE atu muda ami-nia sede suku tanba fatin ida-ne’e kloot liu. Edifísiu ne’e uza hamutuk ba klinika no sede suku, nune’e bainhira komunidade mai ba konsulta saúde no trata dokumentu administrativu, fatin la sufisiente atu simu ema hotu,” Marcelino ba TATOLI iha nia knaar fatin, Fatuhada, Segunda ne’e.
Nia haktuir proposta atu muda sede suku hato’o ona ba Autoridade Munisipál Dili (AMD) iha tinan kotuk atu enkamina ba MAE. Maibé, to’o agora seidauk hetan resposta ofisiál.
Tuir Marcelino, área Ex-Masjid Luru Mata iha espasu luan ne’ebé bele akomoda fatin parazen ba kareta no motorizada, no mos bele dezenvolve ba atividade sosiál no administrativu sira.
Nia konsidera fatin referidu apropriadu atu harii sede suku foun hodi hasa’e efisiénsia servisu autoridade lokal.
Suku Fatuhada kompostu husi aldeia lima mak hanesan Aldeia Fatuhada, Aldeia Marconi, Aldeia Luru Mata, Aldeia Merkadu Komoro no Aldeia Pantai Kelapa.
Dados husi administrasaun suku hatudu katak Suku Fatuhada iha uma-kain 2.538 ho populasaun hamutuk ema 12.142.
Jornalista: Camilio de Sousa
Editór: Filomeno Martins
