Dékada ida ezisténsia, Tatoli komprometidu sai ajénsia notisioza ne’ebé moderna no inovadora

DILI, 27 Jullu 2026 (TATOLI)-Prezidente Konsellu Diretivu Ajénsia Notisioza Timor-Leste Tatoli, I.P., Noémio Falcão, reafirma katak Tatoli kontinua kompromete-an atu sai ajénsia notisioza ida ne’ebé moderna, inovadora, sustentavel no respeitada, la’ós de’it iha rai-laran, maibé mós iha rejiaun ASEAN no komunidade internasionál.

Deklarasaun ne’e hato’o iha nia diskursu durante serimónia komemorasaun aniversáriu ba dékada ida, ajénsia notisioza, ne’ebé realiza iha edifísiu Tatoli, iha Faról, Dili, ohin.

“Haksolok tebes, ba ita hotu ne’ebé marka prezensa iha selebrasaun istórika ida-ne’e, ne’ebé komemora dékada ida ezisténsia Ajénsia Notisioza Timor-Leste, Tatoli, I.P.,”, nia dehan iha serimónia ne’e.

Nia hateten katak aniversáriu ba tinan-10 ne’e sai oportunidade atu haree filafali dalan ne’ebé Tatoli liu ona, avalia rezultadu ne’ebé alkansa, aprende husi dezafiu sira no reforsa vizaun ba futuru.

Tuir nia, durante tinan sanulu nia laran, Tatoli transforma-an husi ajénsia notisioza ne’ebé hahú ho rekursu limitadu sai fonte informasaun ofisiál ne’ebé kredivel, fornese notísia iha nivel nasionál no internasionál, apoia transparénsia governasaun no kontribui ba realizasaun direitu sira sidadaun sira atu asesu ba informasaun loos no konfiavel.

Noémio dehan iha mundu ne’ebé informasaun la’o lalais no dezinformasaun no informasaun falsa sai ameasa boot ba demokrasia, Tatoli iha obrigasaun morál atu kontinua defende lia-loos no étika profisionál.

“Na’i Primeiru-Ministru rasik hanesan mós jornalista veteranu ida, sempre fó atensaun katak, jornalista tenke investigativu. Tatoli iha obrigasaun morál hanesan mídia estatál komunga no kontinua defende lia-loos, no étika profisionál”, dehan.

Nia subliña katak mídia no atividade jornalístika mak instrumentu importante ida atu demokrasia bele funsiona ho di’ak. Tanba ne’e, servisu jornalista idaidak iha valór estratéjiku ba dezenvolvimentu nasionál.

Tuir dirijente Tatoli, durante dékada ida liubá, instituisaun ne’e hasoru dezafiu oioin, maibé mós konsege alkansa progresu importante, liuliu iha área jornalizmu investigativu, haforsa sistema notísia iha multimédia, haburas koperasaun ho ajénsia notisioza internasionál. Aleinde ne’e, promove kapasitasaun jornalista sira, adapta-an ba era dijitál no hadi’a asesu públiku ba informasaun Estadu.

Iha okaziaun ne’e, Tatoli mós inaugura edifísiu foun Tatoli nian ho andar rua, ne’ebé sei uza ba servisu multimídia no Sentru Formasaun Jornalizmu.

“Ohin loron, ita, liuliu ha’u ho kolega sira hotu iha Tatoli orgullu tebes, tanba Tatoli tama ona etapa foun ida ho edifísiu ida ne’ebé sai símbolu ida ba dezenvolvimentu institusionál no investimentu Governu ba setór komunikasaun sosiál”, katak.

Prezidente Tatoli, agradese ba Ministru Planeamentu Investimentu Estratejiku, Gastao Sousa ne’ebé hatene klean serbisu jornalizmu nu’udar pilár importante ba demokrasia.

Noémio Falcão agradese ba Ministru Planeamentu no Investimentu Estratéjiku, Gastão de Sousa, tanba responde lalais ba proposta konstrusaun edifísiu foun, no ba Sekretáriu Estadu Komunikasaun Sosiál, Expedito Loro Dias Ximenes, hamutuk ho parseiru sira seluk ne’ebé fó apoiu ba projetu ne’e.

Nia mós hato’o apresiasaun ba empreza Leldu Unipessoal Lda., ne’ebé finaliza projetu ne’e ho di’ak tebes.

“Ha’u fiar katak espasiu foun ida-ne’e fó biban diak liután ba funsionáriu no jornalista sira hotu nia serbisu. Edifísiu ida-ne’e ami utuliza ba servisu Multimídia no Sentru Formasaun Jornalizmu”, dehan.

Prezidente mós hato’o apresiasaun aas ba jornalista no funsionáriu hotu ne’ebé durante dékada ida kontribui ho dedikasaun, sakrifísiu no profisionalizmu, inklui lideransa sesante sira hanesan Rosario Maia, José da Costa no Manuel Pinto.

Noémio Falcão dehan katak iha era Artifisiál Intelijénsia (AI), Big Data, mídia dijitál no dezenvolvimentu teknolójiku muda maneira ema simu informasaun.

Tanba ne’e, Tatoli sei kontinua investe iha inovasaun, promove jornalizmu bazeia ba dadus, dezenvolve kapasidade jornalista sira, reforsa seguransa dijitál, haburas kooperasaun internasionál no aumenta produsaun konteúdu multilíngua atu promove Timor-Leste ba mundu.

Nia mós konsidera katak iha tinan 2027 presiza reforsa rekursu umanu, liuliu hodi destaka jornalista iha munisípiu hotu, atu haforsa kobertura notísia husi baze.

“Tatoli tenke sai ajénsia notisioza ida ne’ebé moderna, inovadora, sustentavel no respeitadu iha rai-laran, rejiaun ASEAN no komunidade internasionál”, afirma.

Dirijente Tatoli agradese ba Primeiru-Ministru, Xanana Gusmão, membru Governu sira hotu, instituisaun Estadu, parseiru dezenvolvimentu, inklui ABC International Development husi Austrália, China Media Group (CMG) no órgaun komunikasaun sira seluk, nomós ba patrosinadór sira hanesan East Timor Trading Group, Bee Timor-Leste no Bamboo I.P., tanba sira-nia apoiu ba dezenvolvimentu Tatoli.

“Tatoli tenke sai parte husi istória ida-ne’ebé sei hakerek futuru Timor-Leste”, nia konklui.

Jornalista: Nelson de Sousa

Editora: Maria Auxiliadora