Delio Mouzinho konkista sintu HSS iha Bali, dedika vitória ba Timor-Leste
DILI, 27 Jullu 2026 (TATOLI)—Boxista Timor-Leste, Delio Mouzinho, susesu maka’as iha nia luta profisionál bainhira manán nia adversáriu Saroha, husi nasaun Indonézia liuhusi desizaun unanimous iha eventu HSS Boxing Series ne’ebé hala’o iha Bali, Indonézia, Domingu kalan.
Iha luta ne’ebé hala’o to’o ronde dala ualu ne’e, Delio domina husi inísiu to’o finál ho nia estratejia pressure fighter no footwork ne’ebé maka’as. Ho rezultadu ne’e, Delio konsege hada’u sintu kampiaun HSS nian husi Saroha no lori fila mai Timor-Leste.
Notísia relevante : El Matadór Délio Mouzinho halakon boxista Indonézia Burhanudin Aduraf
Hafoin sin finál lian, Delio ne’ebé vensedór emosionál dehan vitória ne’e nia dedika tomak ba povu Timor-Leste.
“Ha’u-nia nasaun kiik liu iha mundu, ema barak mak seidauk koñese. Vitoria ida-ne’e atu halo ema koñese liután ha’u nia nasaun. Vitória ne’e ofrese ba povu Timor-Leste,” Delio hateten iha rin laran.
Luta ho ritmu a’as no guarda ne’ebé sólidu
Desde sinu dahuluk, Delio hatudu nia preparasaun. Nia uza jab hodi kontrola distánsia no buka breixa hodi loke kombinasaun. Delio aplika high guard ne’ebé metin no halo head movement atu evita kontra-golpe husi Saroha.
Iha ronde klaran, Delio hahú aumenta nia intensidade. Nia konsege hakat ba laran ho body shot no hook ba isin no ulun ne’ebé halo Saroha nia defesa sai monu. Saroha tenta fó resposta ho counter punch, maibé Delio nia defensa no clinch work maka lori nia sai livre husi presaun.
Tama ba ronde ualu, Saroha komesa tun nia stamina no la aguenta tan ho Delio nia atake ne’ebé la para. Delio kontinua fó volume punch a’as no halo cut-off ring hodi taka dalan ba Saroha nia movimentu. Iha momentu ne’e árbitru haree Saroha labele ona fó luta ne’ebé kompetitivu no ikus mai termina ho vitória ba Delio.
Motivasaun husi família
Delio rekoñese katak dalan ba vitória ne’e la fásil. Nia dehan iha tempu susar ema barak ko’alia a’at ba nia.
“Kuandu ha’u lakon laiha ema ida mak motiva ha’u. So ha’u-nia mama no família sira ho ema uitoan mak motiva ha’u. Ha’u apreende husi ne’e, ohin ha’u hamrik filafali,” Delio tenik.
Ho vitória ida-ne’e, Delio la lori de’it sintu ba Timor-Leste maibé mós fó orgullu ba nasaun iha mundu boxe internasionál.
Iha pare seluk Boxista Deniel Belo mós sai vensedór iha eventu ne’e hodi hadau mós sintu kampiaun HSS nian hafoin nia halo monu nia adversáriu Prastio Rematc ho KO iha ronda datoluk.
Jornalista : Hortêncio Sanchez
Editora : Julia Chatarina
