Jornalista Timoroan na’in-24 observa direta fatin prodús filme dijitál iha empreza Shanghai
Guangxi, 27 Jullu 2026 ( TATOLI) – Jornalista Timor-Leste nai’in 24 inklui Jornalista TATOLI,I.P na’in-hitu, observa direta prosesu atu halo produsaun filme dijitál no dezenvolvimentu teknólojia audiovizual ne’ebé hala’o iha Shanghai, liuhusi enkontru ho ekipa kreativa no reprezentante indústria média.
CEO Empreza Guangxi Shanghai, TingTing Wang, esplika kona-bá prosesu produsaun filme dijitál, inovasaun teknolójika no oinsá kontén audiovizual modernu ne’ebé bele dezenvolve liuhusi plataforma dijitál.
TingTing Wang haktuir katak indústria filme ohin loron la’ós de’it depende ba kamera no ekipamentu tradisionál, maibé uza intelijénsia artifisial (AI), efeitu vizuál dijitál no sistema produsaun modernu atu aumenta kreatividade no efisiénsia.
Ho mudansa teknolójika sira ne’e sai parte importante husi transformasaun indústria filme no televizaun iha Shanghai.
“Ami kontente simu ami nia maluk jornalista sira husi Timor-Leste.Tanba to’o ohin loron, ami prodús ona kontéudu barak liuhusi plataforma Stardust TV hodi uza teknolojia no kultural adaptasaun atu nune’e istória husi nasaun ida bele hetan gosta husi mundu tomak” ,Timg Ting Wang hato’o ba jornalista TL na’in-24 liuhosi enkontru formal Segunda ne’e, iha Shanghai-Xina.
TingTing Wang fahe esperiénsia ba jornalista internasionál hanesan jornalista TL importante atu eleva jornalista sira-nia koñesentu kona-bá oinsá indústria kreativa Xina dezenvolve no oinsá istória sira bele hato’o ba públiku liuhosi média dijitál sira .
“Ami konsidera vizita ida-ne’e nu’udar oportunidade ba jornalista TL atu aprende kona-bá mudansa iha setór audiovisual, tanba Shanghai sai hanesan sentru importante ba dezenvolvimentu indústria filme, televizaun no kontén dijitál iha China”,nia esplika
Durante iha Xina delegasaun jornalista sira hetan oportunidade atu husu pergunta no ko’alia kona-ba esperiénsia produsaun kontén, dezenvolvimentu média dijitál no oportunidade kooperasaun entre profisionál média hosi Timor-Leste ho China.
Aleinde vizita empreza média Shangai, ekipa delegasaun jornalista sira mos kontinua hala’o vizita dahuluk ba iha Portu Guangxi, hodi aprende oinsá Xina ninia dezenvolve lojístika mundiál. Tanba portu sai sentru lojístika prinsipál iha rejiaun Sul Xina no sai ponte konesaun ba komérsiu entre xina ho nasaun ASEAN.
Jornalista: Celestina Teles
Editór:Florencio Miranda Ximenes
