Pe. Bento: Tatoli bele sai fini di’ak ba Timor-Leste liuhusi publikasaun notísia sira
DILI, 27 Jullu 2026 (TATOLI) – Ajénsia Notisioza Timor-Leste Tatoli, I.P, ohin selebra nia aniversáriu ba da-10, hahú husi 27 Jullu 2016 to’o 27 Jullu 2026, ho misa agradesimentu ne’ebé realiza iha Igreja Motael, Dili.
Iha omília, amu selebrante Pe. Bento Barros, hateten katak Tatoli tenke sai “fini di’ak” ba Timor-Leste, liuhusi publikasaun notísia no informasaun ne’ebé loloos, hodi kontribui ba dezenvolvimentu ba povu no nasaun.
Nia salienta katak servisu komunikasaun la’ós de’it atu fó sai informasaun, maibé mós atu haburas esperansa, hametin unidade no ajuda ema sira hodi komprende realidade.
“Evanjellu fó hanoin ita buat rua fundamentál. Tatoli sai fini di’ak ida ba sosiedade hodi nu’udar fini di’ak ne’ebé Kristu uza halo komparasaun ba Maromak ninia reinu. Husi ita-nia servisu sira bele haburas no hamahan Timor-oan sira. Evanjellu tulun mós ita atu sai hanesan fermentu ida ne’ebé ema kahur ba fariña hodi halo nia sa’e didi’ak haua’in paun ne’ebé atu prodús”, dehan.
Saserdote mós lembra katak durante tinan 10 ne’e Tatoli alkansa ona buat barak, maibé instituisaun tenke kontinua haraik-an, rona-malu no serbí ho unidade.
Ho selebrasaun tinan 10 Tatoli ho tema “Inovasaun, Kredibilidade no Transformasaun Dijitál”, tuir Pe. Bento, ema ne’ebé atu iha kredibilidade maka presiza hala’o ninia knaar ho roman Maromak ninia futar liafuan. “Presiza haraik-an, rona-malu nafatin, no presiza sai fini di’ak no presiza sai fermentu ne’ebé tau hamutuk ka unidade ho fariña hodi sai boot no ua’in liután. Ita persiza la’o hamutuk nafatin nu’udar família boot ida Tatoli nian”, katak.
Nia subliña ho tansformasaun dijitál buat ida ne’ebé atuál no ezijente ba moris nu’udar indivíduu nomós nu’udar instituisaun Tatoli nian. “Kona-ba ne’e hakarak partilla hamutuk ho imi mensajen ensíklika dahuluk Papa Leão XIV nian ne’ebé foin sai fulan hirak liubá ho naran Magnífica Humanitas”
“Títulu Magnífica Humanitas ne’e bele tradús ba nu’udar “Magnífica Humanidade”. Espresaun ida-ne’e revela assombro diante dignidade humana ne’ebé Maromak mak kria no rekorda responsabilidade atu prezerva dignidade ne’e nafatin iha períodu profunda transformasaun kulturál no teknolójika nian ne’e”, dehan.
Nia haktuir katak hodi hili títulu Magnífica Humanitas ne’e, Papa Leão XIV reafirma eziste iha ema sira nia-an grandeza ida ne’ebé laiha mákina bele reprodús. Ema moris bele hetan valór ida ne’ebé ultrapasa produtividade no dezempeñu kapasidade téknika.
“MagníficaHumanitas fó hanoin mai ita katak nu’udar sarani presiza haree ba iha transformasaun teknolójika sira ho disernimentu espirituál, responsabilidade morál no atensaun ba dignidade umana. Hodi públika Magnifica Humanitas, Papa Leão XIV reafirma katak dezenvolvimentu umanu ida ne’ebé loloos labele sukat ho de’it efisiénsia téknika ka kreximentu ekonómiku”, dehan.
Nia akrexenta mensajen ne’e konvida umanidade tomak atu hateke filafali ba ema ninia dignidade, ba responsabilidade morál no ba nesessidade atu rekonstrui relasaun ne’ebé tidin-an metin iha lia-loos, iha justisa no iha komuñaun.
“Dokumentu Magnifica Humanita fó hanoin filafali mai ita katak nenhuma automasaun bele substitui fali esperiénsia umana kona-ba domin, mizerikórdia no prezensa reál entre ema sira. Ensíklika ne’e permanese sai nu’udar xamada ida ba umanidade atu labele entrega ba teknolojia, buat sira ne’ebé pertense ba ema ninia klamar, hanesan kapasidade atu hadomi, atu rekoñese lia-loos, atu moris iha komuñaun no atu permanese iha Maromak futar oin hanesan kriatura, nunka hanesan mákina”, nia afirma.
Prezidente Konsellu Diretivu, Tatoli,I.P, Noémio Falcão, hateten mensajen sira ne’ebé amu selebrante hato’o iha omília ne’e ajuda tebes Tatoli iha ninia knaar publikasaun notísia sira.
Jornalista :Arminda Fonseca
Editora: Maria Auxiliadora
