Prezidente Repúblika hala’o vizita Estadu bá Vanuatu
DILI, 27 Jullu 2026 (TATOLI)-Prezidente Repúblika, José Ramos-Horta, segunda ne’e, hala’o ninia vizita Estadu dahuluk ba Repúblika Vanuatu, hodi partisipa iha selebrasaun Loron Independénsia Vanuatu nian ba da-46 ne’ebé sei realiza iha 30 fulan-Jullu.
Vizita Estadu ne’e reafirma lasu amizade no solidariedade ne’ebé metin entre Timor-Leste no Vanuatu Estadu Dezenvolvimentu Illa Ki’ik rua ne’ebé unidu liuhusi aspirasaun komún ba dezenvolvimentu sustentavel , reziliénsia klimátika, no estabilidade rejionál.
“Vanuatu iha fatin ida-ne’ebé espesiál iha Timor-Leste nia memória istórika. Durante Timor-Leste nia luta ba autodeterminasaun, Vanuatu nu’udar Estadu illa Pasífiku úniku ne’ebé hamutuk ho ita”, haktuir komunikadu ne’ebé Tatoli asesu, ohin.
Tuir ajenda ne’ebé iha, Prezidente Ramos-Horta sei to’o iha Port Vila iha loron 28 Jullu no sei simu ho Guarda de Honra. Programa ofisiál hahú ho jamtar boas-vindas ne’ebé ofrese husi Ministru Negósiu Estranjeiru Vanuatu nian.
Iha loron 29 fulan-Jullu, Prezidente sei hala’o série enkontru ho altu nivel sira, hahú ho konversa sira ho Prezidente Repúblika Vanuatu, Nikenike Vurobaravu, tuir fali ho enkontru billaterál ho Primeiru-Ministru, Jotham Napat.
Programa sira inklui enkontru ho Prezidente Parlamentu, Hon. Stephen Felix. Prezidente Ramos-Horta sei hato’o palestra públika iha Universidade Nasionál Vanuatu no partisipa iha serimónia boas-vindas tradisionál iha Chiefs Nakamal.
Iha loron 30 Jullu, Prezidente sei partisipa iha Selebrasaun Loron Independénsia Repúblika Vanuatu nian ba da-46.
Durante vizita ne’e, Prezidente Ramos-Horta sei konfere Ordem de Timor-Leste ba líder Vanuatu sira nu’udar rekoñesimentu ba sira-nia kontribuisaun signifikativu ba Timor-Leste.
Vizita ida-ne’e fó kontinuidade hafoin reuniaun Konsellu Ministru ne’ebé hala’o foin lalais ne’e iha loron 22 Jullu, ne’ebé aprova ona Akordu entre Repúblika Demokrátika Timor-Leste no Repúblika Vanuatu kona-ba Programa Koperasaun Téknika ba Dezenvolvimentu.
Akordu ne’e ho objetivu atu promove kooperasaun dezenvolvimentu iha área estratéjika sira, no estabelese mekanizmu sira ba kolaborasaun entre nasaun rua ne’e.
Prezidente Ramos-Horta sei aranka husi Vanuatu iha loron 31 Jullu bá Melbourne ne’ebé iha loron 01 Agostu sei hamutuk ho komunidade Timor-oan sira hodi selebra aniversáriu ba da-50 refujiadu Timor-oan sira dahuluk to’o iha rai Austrália.
TATOLI
