Delegasaun jornalista TL vizita fábrika produsaun Spaghetti iha Guangxi
GUANGXI, 28 Jullu 2026 (TATOLI)—Delegasaun jornalista na’in 24 husi Timor-Leste kontinua hala’o vizita ba instalasaun indústria iha Repúblika Populár Xina inklui vizita ba fábrika produsaun Spaghetti iha Provínsia Guangxi, parte súl Xina nian.
Iha vizita nee empreza Luobawang Food Tecnology Co, Ltd iha Xina uza teknolojia moderna hodi garante kualidade, seguransa no efisiénsia iha prosesamentu produtu alimentasaun.
Vizita ne’e ho objetivu atu haree direta prosesu produsaun aihan iha Xina liuliu oinsá indústria sira uza teknolojia moderna hodi garante kualidade, seguransa no efisiénsia iha prosesamentu produtu alimentasaun.
Durante vizita, jornalista sira hetan oportunidade atu haree etapa oioin husi prosesamentu Spaghetti, hahú husi preparasaun matéria-prima, prosesu mistura, formasaun produtu, secagem, embalajen no kontrolu kualidade antes produtu sai ba merkadu.
Fabrika ne’e hatudu katak aplikasaun teknolojia automátika ajuda hamenus erru umanu, aumenta kapasidade produsaun no asegura katak produtu sira kumpre padraun seguransa aihan.
Delegasaun sira-ne’e mós hatene katak dezenvolvimentu indústria aihan iha Xina la’o hamutuk ho inovasaun teknolojia, peskiza no jestaun moderna, ne’ebé sai hanesan fator importante atu sustenta produsaun iha eskala boot.
Provínsia Guangxi nu’udar rejiaun estratéjika iha parte súl Xina no iha relasaun kooperasaun ho Timor-Leste iha área oioin inklui ekonomia no interkámbiu.
Vizita jornalista Timor-Leste nian ba indústria sira iha Xina sai oportunidade ida atu aumenta koñesimentu kona-ba avansu teknolojia no bele lori esperiénsia foun ba públiku Timor-Leste kona-ba importánsia modernizasaun iha setór produsaun aihan.
Jornalista : Felicidade Ximenes
Editór : Cancio Ximenes
