Governu haloot ona urna restu mortál 958 husi Atsabe iha Jardin Eroi Fatukeru
ERMERA, 28 Jullu 2026 (TATOLI)—Governu liuhusi Ministru Asuntu Kombatente Libertasaun Nasionál (MAKLN), Gil da Costa ‘Oan Soru’ ho Komuniade Munisípiu Ermera haloot ona urna husi restu mortál hamutuk 958 husi Postu Administrativu Atsabe iha Jardin Eroi Fatukeru, tersa ne’e.
“Restu mortál iha Ermera tomak, ita atu haloot ne’e hamutuk 5.246 maibé ohin loron primeiru ne’e haloot uluk 958 ne’e husi Postu Atsabe nian. Aban, ita haloot fali husi Postu seluk nian hanesan Railaku, Hatulia Letefoho, Ermera hodi kompleta 1.600,” Ministru Gil Oan Soru hateten hafoin haloot urna restu mortál ne’e.
Ministru ne’e dehan, urna hamutuk 1.600 maibé totál restu mortál hamituk 5.246 tanba iha urna ida bele tau restu mortál rua ka tolu hamutuk iha urna ida.
Serimónia haloot Restu Mortál ne’e la marka prezensa husi Presidente Autoridade Munisípiu Ermera.
Tanba ne’e, Ministru Gil da Costa Monteiro ‘Oan Soru’, hateten Prezidente Autoridade la partisipa tanba iha asuntu esensiál balun.
“Loos, Prezidente Autoridade la marka prezensa, ha’u la’ós nia Ministru, nia kumpre orientasaun husi nia ministru maibé laiha buat ida. Autoridade sira hanesan ha’u-nia maun sira, maun Taur Matan Ruak mai, maun Lere Anan Timur mós mai, sira mai mós loos ona, haloot sira-nia maluk nia Restu Mortál, sira mak mai ha’u sente valór loos,” Ministru hateten.
Oan Soru hateten, hanesan autoridade presiza koloka prioridade no importánsia hodi partisipa iha loron importante sira, tanba husi saudozu sira nia-luta mak Timor-Leste hetan ukun an.
Prezidente Autoridade Munisípiu Ermera, José Martinho dos Santos Soares, justifika razaun la partisipa iha serimónia haloot Restu Mortál tanba hetan orientasaun husi Primeiru-Ministru, Kay Rala Xanana Gusmão, hodi partisipa pose ba Prezidente Autoridade Munisípiu Aileu.
“Atividade ne’e hala’o kedan iha loron rua ba kotuk halo atividade kulturál no horisehik misa boot iha ne’e, maibé ohin nian parte dader ha’u labele partisipa tanba hetan konvite obrigatóriu ida katak ami ba partisipa Tomada de Posse ba Prezidente Autoridade Munisípiu Aileu foun. Horisehik lorokraik, ha’u informa ona ba Ministru maun Gil ‘Oan Soru’ katak aban dadeer ha’u la partisipa no lorokraik mak ha’u partisipa,” nia klarifika.
Daudaun ne’e, Governu haloot ona Restu Mortál husi Postu Administrativu Atsabe hamutuk urna 958s, no sei kontinua kuarta-feira aban haloot Restu Mortál hamutuk 642 husi Postu Administrativu Hatulia, Letefoho, Railaco no Ermera.
Jornalista : Hortêncio Sanchez
Editór : Cancio Ximenes
