Governu sei esforsu atu dezenvolve lei hodi kombate krime sibernétika
DILI, 28 Jullu 2026 (TATOLI)-Primeiru-Ministru, Kay Rala Xanana Gusmão, deklara katak Governu sei esforsu dezenvolve lei hodi kombate krime sibernétika ne’ebé akontese iha Timor-Leste.
Primeiru-Ministru, Kay Rala Xanana Gusmão, hateten konetividade rede internet boot liu lori mós responsabilidade boot-liu.
“Hanesan husi konetividade sira-ne’e mós bele utiliza ba atividade fraude, cibercrime, esplorasaun ho ataké kontra indivídu, empreza no instituisaun públika,” Primeiru-Ministru, Kay Rala Xanana Gusmão, relata iha edifísiu CTL, E.P, Bebonuk, ohin.
Xefe Governu dehan utilizasaun rede internet aumenta, Timor-Leste mós tenke reforsa kapasidade atu proteje populasaun, empreza ho instituisaun sira.
“Governu sei kontinua dezenvolve lei, instituisaun ho kapasidade téknikas nesesária atu kombate krime sibernétika, proteje informasaun pesoál no defende ita-nia sistema nasionál,” PM Xanana afirma.
Líder nasionál ne’e dehan, kabu submariñu Timor-Leste tenke opera infraestrutura ho dixipliña, profisionalizmu no forte seguransa tenke jere ba interese timoroan tomak.
“Ita-nia joven sira labele hanesan de’it konsumidór teknolojia. Maibé sira tenke iha kompeténsia atu utiliza teknolojia hodi kria negósiu, presta servisu no rezolve problems ne’ebé ita-nia nasaun enfrenta,” nia dehan.
Jornalista : Alexandra da Costa
Editór : Cancio Ximenes
