PNTL rejista detein ona suspeitu 400-resin ba krime scam call center
DILI, 28 Jullu 2026 (TATOLI)—Polísia Nasionál Timor-Leste (PNTL) rejista ona suspeitu hamutuk 400 suspeitadu iha krime scam call center.
Portavós PNTL, Superintendente Xefe Polísia João Belo dos Reis, hateten, hahú husi operasaun iha Tibar no depois kontinua iha parte barak iha Dili laran inklui iha Hera, Metiaut, Tasi-Tolu, no Tibar konsege detein sidadaun estranjeiru husi Xina, Indonézia, Japaun, Myanmar, Kambódia no Laos.
“Sidadaun estranjeiru ne’ebé ita detein iha operasaun scam call center nian iha 400-resin, ne’ebé mak ita aprezenta ona ba Tribunál,” João Belo hateten ba Jornalista sira iha ninia knaar fatin, Komandu Jerál PNTL, Kaikoli, Tersa ne’e.
Notísia relevante : Arguidu na’in-ida ba krime scam iha Bedois hetan medida kausaun $10.000
Maski nune’e, Portavós admite katak prosesu investigasaun ba plataforma dijitál ne’e la fásil
“Ita husu nafatin ba ita-nia maluk sira husi Estadus Unidus Amérika, Indonézia no Austrália, ita-nia pesoál sira ne’ebé maka hetan informasaun no ita-nia parseiru Amérika sira hotu-hotu bele fó hanoin balun para halo investigasaun la’o di’ak liután,” nia akresenta.
Aleinde ne’e, iha vítima barak mak hato’o keixa ba parte Polísia liga ho krime scam call center, ne’ebé envolve husi ema baibain to’o ema ne’ebé iha kargu públiku.
“Husi ema mukit to’o riku barak hato’o keixa mas ha’u dehan prosesu investigasaun ba dijitál forénsiku la’o hela. Ita-nia maluk sira ne’ebé hato’o keixa iha Polísia ita halo hela koneksaun ba sira-nia keixa no aparellu sira ne’ebé sira (suspeitu) uza oinsá mak ita bele deskobre aktu sira ne’e mai,” nia dehan.
Jornalista : Natalino Costa
Editora : Julia Chatarina
