Timoroan iha Peterborough selebra misa hodi fó omenajen ba saudozu Lú Olo no Padre João Felgueiras
DILI, 28 Jullu 2026 (TATOLI) – Komunidade Timoroan iha sidade Peterborough ne’ebé halibur-an iha East Timorese Association Peterborough (ETAP) selebra misa hodi fó omenajen ba saudozu Francisco Guterres ‘Lú Olo’ no saudozu Reverendísimu Padre João de Vasconcelos Baptista Felgueiras, SJ iha loron Sábadu, 25 Jullu iha igreja Sacred Heart and Saint Oswald’s Parish, 933 Lincoln Rd, Walton, Peterborough, Reinu Unidu.
Hafoin misa tuir kedas konvíviu fraternál hodi hametin relasaun amizade entre Timoroan iha diáspora.
Misa selebrasaun ne’e dirije hosi padre Indianu na’in-rua Rev. Padre Selaan no Rev. Padre Paul. Marka prezensa iha misa ne’e Embaixadór RDTL iha London Joao Paulo Rangel no komitiva no timoroan sira iha sidade Peterborough no sidade seluk tán.
Molok misa hahú, komisaun organizadora prepara liafuan bemvindu hosi presidente komunidade ETAP Celso Oliveira, tuir fali Lian Dadolin hosi Ana Rosa, tuir kedas lé biografia saudozo Lú Olo hosi Demetrio Soares no lé biografia Rev. Pe. Joao Filgueiras hosi Alex Sarmento.
“Hodi Estadu RDTL nia naran hakarak hato’o agradesimentu ba ETAP no komisaun organizadora ne’ebé organiza selebrasaun misa omenajen ida-ne’e hodi fó onra no respeitu ba eroi nasionál sira no konvíviu fraternál hodi hametin relasaun amizade no dame entre Timoroan sira,” Embaixadór João Paulo Rangel agradese komisaun organizadora.
Prezidente ETAP, Celso Oliveira, informa, eroi ida mate hamosu eroi seluk.
“Ita-nia misa no orasaun hanesan gratidaun ba sakrifísiu tomak ne’ebé eroi halo ba rai doben Timor-Leste. Sira-nia isin mak la hamutuk ona ho ita maibé sira-nia valorór, doutrina no hanorin sira hamutuk nafatin ho ita. Eroi kontinua sai referénsia iha ita-nia moris tomak. Sira la ejiji ka reklama buat ida. Sira husu de’it atu ita sira ne’ebé sei moris atu iha uniaun, dame, investe iha estudu, buka matenek, respeitu malu, servisu maka’as ba ita nia moris.”
Prezidente Komisaun Organizadora, Demetrio Silva hateten, hato’o obrigado wain ba maluk sira hotu ne’ebé kontribui ona tempu, osan no ai-han.
“Hodi ita hotu nu’udar Timoroan la’o-rai bele hamutuk fo’o omenajen ba eroi nasionál sira. Eventu ida ne’e eventu nasional”.
Saudozo Dr. Francisco Guterres ‘Lú Olo’, nu’udar prezidente ba Asembleia Konstituinte, Eis Presidente Repúblika no Presidente Partidu FRETILIN. Lú Olo moris iha Ossu, 07/09/1954 no mate iha Malázia, iha loron 21/06/2026 no Saudozu Rev. Pe. João de Vasconcelos Baptista Felgueiras, SJ, moris iha Guimarães, 09/06/1921 no mate ho tinan 105 iha Dili, iha loron 03/07/2026.
TATOLI
