TradeInvest introdús oportunidade asesu merkadu Xina ba eksportadór Timor-Leste
DILI, 28 Jullu 2026 (TATOLI) – TradeInvest Timor-Leste organiza workshop ho tema “Asesu Merkadu Xina” hodi introdús ba empreza eksportadóra sira iha Timor-Leste kona-ba mekanizmu no rekizitu esportasaun produtu lokál ba merkadu Xina.
Adjuntu Diretur Ezekutivu TradeInvest Timor-Leste, Roberto Lai, hateten workshop ne’e realiza liuhosi kolaborasaun ho Embaxada Timor-Leste iha Xina, Embaxada Repúblika Popular Xina iha Timor-Leste no General Administration of Customs of China (GACC), ho objetivu atu promove no fasilita asesu eksportadór nasionál sira ba merkadu internasionál, liuliu merkadu Xina.
Roberto dehan TradeInvest simu mandatu husi Governu atu promove investimentu no dezenvolve esportasaun produtu Timor-Leste ba merkadu gloál.
Liuhosi Diresaun Promosaun Esportasaun, TradeInvest kontinua presta apoiu ba eksportadór sira, liuliu empreza ne’ebé rejista ona iha TradeInvest.
“Merkadu Xina oferese oportunidade estratéjika ba Timor-Leste tanba iha populasaun boot no kapasidade konsumu aas. Maibé, eksportadór Timor-Leste presiza kumpre rekizitu no padraun ne’ebé merkadu Xina ezije, inklui qualidade produtu, sertifikasaun no prosesu rejistu iha autoridade alfándega Xina,” Roberto dehan ba jornalista sira iha Timor Plaza, ohin.
Nia esplika katak, to’o agora, produtu Timor-Leste ne’ebé asesu ona merkadu Xina sei limitadu, no kafé kontinua sai produtu prinsipal. Maibé, iha futuru, TradeInvest espera Timor-Leste bele diversifika esportasaun ba produtu agríkola no produtu seluk ne’ebé iha potensial atu tama ba merkadu Xina.
Iha okaziaun ne’e, Roberto mos agradese ba Embaxada Timor-Leste iha Xina, Embaxada Xina iha Timor-Leste, estudante no parseiru sira ne’ebé durante ne’e fó apoiu atu hametin relasaun komersiál entre nasaun rua.
Nia konsidera kolaborasaun entre parte rua importante atu loke oportunidade ba produtu Timor-Leste tama ba merkadu Xina.
Iha workshop ne’e, Diretur Ezekutivu Kompanhia ASELDA, Higino da Costa Freitas, ne’ebé reprezenta empreza eksportadóra sira, agradese ba TradeInvest tanba organiza formasaun ida-ne’e hodi aumenta koñesimentu kona-ba prosesu esportasaun.
“Workshop ohin importante tebes ba ami, tanba ami aprende mekanizmu no prosedimentu atu bele esporta produtu lokál ba Xina. Timor-Leste iha produtu barak hanesan kafé, baunilla, kamii no produtu seluk ne’ebé iha potensial atu faan iha merkadu internasionál. Maibé, durante ne’e ami falta informasaun no koñesimenbtu kona-ba prosesu no rekizitu Esporta produtu ba Xina,” Higino dehan.
Nia mos husu ba TradeInvest Timor-Leste atu kontinua fasilita prosesu lisensa no sertifikasaun ba empreza eksportadóra sira, hodi nune’e sira bele asesu merkadu internasionál.
Jornalista: Camilio de Sousa
Editór: Filomeno Martins
