Autoridade Bahatata no komunidade inisiativa hadi’a estrada
VIKEKE, 29 Jullu 2026 (TATOLI)—Autoridade Suku Bahatata, Postu Uatukarbau, Munisípiu Vikeke, hamutuk ho komunidade inisitiva hadi’a estrada husi Suku Loiulu no Bahatata liga bá Postu Baguia hodi fasilita movimentu sira.
Xefe Suku Bahatata, Patrício Maria Pinto hateten, kona-ba hadi’a estrada husi Loiulu no liga bá Baguia ne’e inisiativa autoridade lokál hamutuk ho komunidade mak servisu ke’e dalan no taka estrada kuak sira hodi fasilita movimentu transporte sira asesu Suku Bahatata.
“Kona-ba normaliza estrada husi ami-nia suku Bahatata liga Baguia no husi Loiulu mai ami-nia Suku Bahatata ne’e ami mak ke’e rasik dalan sira ne’ebé rai monu taka dalan sira-ne’e, tanba durante udan ne’e karreta labele asesu mai ona ami-nia suku. Tan ne’e mak ami inisiativa organiza malu hadi’a estrada,” Patrício hateten ba TATOLI via telefónika, Kuarta ne’e.
Autoridade Komunitária Suku Bahatata ne’e relata estrada ne’ebé komunidade suku halo normalizasaun mak hanesan ke’e rai ne’ebé taka dalan, hasai fatuk boot sira-ne’ebé iha estrada klaran no taka rai ba estrada kuak sira-ne’ebé estragu.
“Ami servisu durante loron tolu komesa husi Loiulu bá Baguia hamutuk kilómetru haat resin ona. Ami esforsu an hadi’a maibé agora karreta sira seidauk bele asesu tanba rai sei udan ne’ebé dalan sira ne’e sei mamar,” Patrício haktuir.
Nia fó hanoin fali katak durante ne’e negosiante sira-ne’ebé ho karreta fa’an sasán nesesidade bázika la tama iha Suku Bahatata, komunidade mak bá sosa direta iha Postu Baguia mak lalin fali mai fa’an iha Suku Bahatata nune’e daudaun presu folin sasán kontinua sa’e.
“Uluk Aqua boot ida ho folin $0,50, Aqua ki’ik $0,25, maibé agora sa’e ona ba $0,76, Aqua ki’ik $0,40. Foos mós agora folin seidauk tun, saka kilógrama 25 ho folin $20 (uluk folin $17), foos saka 20 kilógrama 20 $17.50 (uluk folin $14), maibé agora folin sa’e maka’as tanba kondisaun estrada aat,” nia informa.
Tuir dadus, Suku Bahatata ho totál populasaun hamutuk na’in-890 no totál uma-kain 193.
Iha fatin ketak, Koordenadór Institutu Jestaun Apoiu ba Dezenvolvimentu Infraestutura, Institutu Públiku (IGEADI, I.P.) Destakadu Munisípiu Vikeke, Marcelino Santo Babo hateten, kona-ba normalizasaun estrada liga husi Baguia bá Suku Bahatata, ekipa sira halo ona normalizasaun.
“Ita-nia ekipa agora daudaun iha hela Suku Afaloikai (Baguia) normaliza ona pontu rua inklui mota Aekoni nian. Estrada aat iha fatin barak, maibé ita labele responde dala ida, tanba ita mós iha limitasaun ba ekipamentu pezadu sira. Tan ne’e mak ita labele rezolve dalan sira-ne’e dala ida,” nia hato’o.
Jornalista: Vitorino Lopes da Costa
Editór: Xisto Freitas da Piedade
