CICG lori jornalista TL vizita Wuling Intelligent

July 29, 2026
11:04 AM
Facebook Instagram X WhatsApp Telegram

China International Communications Group (CICG) lori delegasun Jornalista Timor-Leste observa direta empreza automovel SAIC-GM-Wuling (SGMW) ne’ebé dezenvolve sistema produsaun veíkulu utiliza Artifisiál Interjénsia (AI) no uza teknolojia dijitál ba automatizasaun fábrika veíkulu no aumenta efisiénsia hodi garante kualidade veíkulu sira iha merkadu internasionál. Imajen TATOLI/ Francisco Sony

LIUZHOU, 29 Jullu 2026 (TATOLI)—Ekipa China International Communications Group (CICG), lori delegasaun jornalista Timor-Leste (TL) na’in-24 vizita SAIC-GM-Wuling Intelligent Island Manufacturing Factory iha Liuzhou, Provínsia Guangxi, Repúblika Populár Xina.

Kompañia ne’e rasik harii iha tinan 1958 ho naran lokál Wuling. Dahuluk sira investe iha produsaun tratór ne’ebé objetivu atu apoiu servisu produtividade nian liuliu iha setór agrikultura, maibé haree ba dezenvolvimentu iha rai-laran, kompañia refereida muda nia estratéjia investe fali ba fábrika karreta ne’ebé sira inisia mak karreta marka L110.

Iha tinan 2002, parte kompañia asina akordu tama ba faze dezenvolvimentu foun no estabelese ofisiál hanesan empreza lokál ba empreza moderna ba fábrika karreta nian iha Liuzhou. No iha tinan 2018 empreza ne’e rasik propoin estratéjia tolu, kompostu halo produsaun ba karreta pasajeira, halo produsaun transporte eletróniku no intelejente inklui halo internasionalizasaun ba mundu atuál, kontinua halo produsaun ba kareta sira ho versaun foun utiliza Artifisial Intelijénsia (AI).

Iha tinan 1978, Xina hahú halo polítika abertura no reforma hodi hahú dezenvolve ekonomia orientada ba merkadu. Iha tempu ne’ebá, empreza ne’e muda ninia produsaun ba bens konsome. Ida-ne’e mak mákina tesi roupa (máquina de costura) iha tempu ne’ebá.

Iha tinan 1982, empreza ne’e hahú tama ba merkadu Ázia, no iha tinan 1985, marka Wuling lansadu.

Iha tinan 2001, hafoin tama Xina ba Organizasaun Mundial Komérsiu (WTO) no abertura merkadu Xina, indústria automobilística mós hahú loke ba kompañia automobilístika internasionál sira.

SAIC-GM-Wuling Automobile (SGMW) sai hanesan empreza konjunta ho parte husi Shanghai Automotive Group, General Motors, no parte husi Guangxi. Empreza konjunta ne’e harii iha tinan 2002.

Depoizde ne’e, SGMW tama ba faze dezenvolvimentu lalais. Modelu sira hanesan Wuling Sunshine, Wuling Rongguang, no Wuling Hongguang hetan susesu boot.

Wuling Sunshine vende ona besik millaun 5.8 unidade. Wuling Hongguang (karreta kór azúl) vende ona besik millaun 6.24 unidade. Sira-ne’e hotu tama iha kategoria veíkulu komersiál inteligente (ICV – Intelligent Connected Vehicles).

Iha Kúpula Xina iha Indonézia, tinan 2022, ho marka Wuling mós hetan atensaun iha merkadu rejionál.

Jornalista: Osória Marques

Editór: Xisto Freitas da Piedade