Governu aprova rejime subvensaun públika ba orgaun komunikasaun sosiál
DILI, 29 Jullu 2026 (TATOLI)—Governu liuhusi desizaun Konsellu Ministru aprova projetu Dekretu-Lei ne’ebé aprezenta husi Sekretáriu Estadu Komunikasaun Sosiál, Expedito Dias Ximenes, kona-ba rejime subvensaun públika ba orgaun komunikasaun sosiál sira.
Objetivu husi diploma ida-ne’e atu hametin sustentabilidade ba setór ne’e, asegura sirkulasaun livre kona-ba informasaun nomós promove pluralizmu no diversidade opiniaun sira.
Sekretáriu Estadu Komunikasaun Sosiál, Expedito Loro Dias Ximenes, hateten Governu aprova proposta rejime orgaun komunikasaun sosiál ida, nune’e rejime ida-ne’e foku liu ba mídia konvensionál privadu no mídia plataforma dijitál sira.
“Hanesan ita hotu hatene katak kualker mídia konvensionál no plataforma imprensa iha papel importante tebes tuir mandatu konstitusionál no prosesu dezenvolvimentu nian,” nia dehan ba jornalista sira iha Palásiu Governu, ohin.
Tanba ne’e mak governante ne’e dehan Governu liuhusi Konsellu Ministru ohin aprova diploma rezolusaun ida atu fó apoiu subvensaun públiku ba orgaun komunikasaun sosiál
“Konserteza apoiu ida-ne’e sei fó ho forma proprosionál (produtividade) tanba durante ne’e mós SEKOMS fó apoiu ba mídia konvensionál no plataforma dijitál privadu sira, ho aumenta rejime rezolusaun ida-ne’e oinsá mak Governu haree papel importante husi orgaun komunikasaun sosiál,” nia hateten.
Iha oportunidade ne’e, nia hakruir mós rekomenda husi Governu ba SEKOMS katak bainhira rejime subvensaun ne’e aprova atu konvida dirijente mídia sira hodi aprezenta sira-nia planu asaun ida-idak nian durante tinan ida.
Entretantu ida-ne’e nu’udar inisiativa Governu nian ida-ne’ebé ho objetivu atu fó apoiu ba órgaun komunikasaun sosiál sira bazeia ba kritériu ne’ebé objetivu, transparente no la diskriminatóriu, la fó impaktu ba nia independénsia editoriál ka liberdade informasaun no imprensa nian.
Jornalista : Alexandra da Costa
Editór : Cancio Ximenes
