Governu fó kompeténsia ba MTA atu selebra akordu ho Portugál-Mosambiké
DILI, 29 Jullu 2026 (TATOLI)—Governu liuhusi reuniaun Konsellu MInistru deside fó komepténsia tomak ba Ministru Turizmu no Ambiente, Francisco Kalbuadi Lay, atu asina planu asaun, Memorandu Entendimentu ho Portugál no Mosambiké.
Proposta ne’e aprezent husi Ministru Turizmu no Ambiente, Francisco Kalbuadi Lay, iha reuniaun Konsellu Ministru, kuarta (28/07) iha Palásiu Governu, ohin.
Iha asina memorandu ne’e mak dahuluk kona-ba Planu Asaun entre Ministériu Turizmu no Ambiente Repúblika Demokrátika Timor-Leste no Ministériu Ekonomia no Koezaun Territoriál Repúblika Portugál nian kona-ba formasaun iha área turizmu ba períodu 2026-2028.
Objetivu husi planu asaun ne’e atu hametin kooperasaun entre nasaun rua ne’e kona-ba formasaun profisionál iha área turizmu, liuhosi kualifikasaun estudante, formadór no dirijente sira, hodi promove transferénsia koñesimentu, exelénsia formasaun no internasionalizasaun ensinu profisionál iha futuru.
Daruak mak Planu Asaun ba implementasaun Memorandu Entendimentu entre Governu Repúblika Angola no Governu Repúblika Demokrátika Timor-Leste iha área turizmu.
Objetivu husi planu asaun ne’e atu promove fluksu turístiku, interkámbiu institusionál, formasaun no kapasitasaun, peskiza, no mós promosaun investimentu turístika entre nasaun rua ne’e.
Datoluk kona-ba Akordu Kooperasaun iha área Turizmu entre Governu Repúblika Mosambiké no Governu Repúblika Demokrátika Timor-Leste.
Objetivu husi akordu ida-ne’e atu hametin baze legál hodi promove no fasilita kooperasaun institusionál no emprezariál entre nasaun rua ne’e iha setór turizmu.
Jornalista : Alexandra da Costa
Editór : Cancio Ximenes
