KM aprova relatóriu finál projetu Design, Build and Finance husi Suai Supply Base
DILI, 29 Jullu 2026 (TATOLI)—Governu liuhusi reuniaun Konsellu Ministru, kuarta ne’e, aprova relatóriu avaliasaun finál ba proposta projetu Design, Build and Finance (DBF) husi Suai Supply Base (SSB).
Proposta ne’e aprezenta direta husi Ministru Petróleu no Rekursu Minerál, Francisco da Costa Monteiro, no ikus mai Konsellu Ministru delibera hodi aseita.
Sekretáriu Estadu Komunikasaun Sosiál, Expedito Dias Ximenes, hateten ohin mós Governu aprova proposta ida kona-ba dezeñu build and finance ne’ebé sei halo supply base.
“Entaun proposta ne’e ohin hetan aprovasaun, nune’e sei iha kooperasaun servisu entre MPRM ho Ministériu Finansa inklui MPIE, hodi haree oinsá mana supply base ne’e bele hala’o iha tempu oin mai, liuliu kompañia ne’e kaer projetu jalan tol iha Betanu no Suai,” nia informa ba jornalista sira iha Palásiu Governu, ohin.
Iha proposta ne’e aseita kona-ba relatóriu avaliasaun finál ba proposta relasiona ho projetu Design, Build and Finance (DBF) hosi Suai Supply Base (SSB) no konsekuente adjudikasaun ba empreza manán-na’in, China Civil Engineering Construction Corporation (CCECC).
Iha mós relatóriu avaliasaun finál ba proposta relasiona ho projetu Design, Build and Finance (DBF) husi auto-estrada Zumalai ba Natarbora:
Lote 1, Seksaun 1 – ZUMALAI-BETANO HIGHWAY (STA, 34+155-STA 59+767) no konsekuente adjudikasaun ba empreza manán-na’in Shangai Construction Group Co., Ltd (Xina);
Lote 2, Seksaun 2 – BETANO-UMA BERLOIC HIGHWAY (STA, 59+767-STA 85+259) no konsekuente adjudikasaun ba empreza manán-na’in Liangshan Construction Holding Group Co. Ltd (Xina) iha Joint Venture ho empreza Beijing Texida Transportation Facilities Consultants Co., LTD. (Xina);
Lote 3, Seksaun 3 – UMA BERLOIC-NATARBORA HIGHWAY (STA. 85+259-STA.110+787) no konsekuente adjudikasaun ba empreza manán-na’in China Civil Engineering, Construction Corporation (CCECC).
Jornalista : Alexandra da Costa
Editór : Cancio Ximenes
