Komunidade iha aldeia Lesu seidauk asesu eletrisidade dezde independénsia
DILI, 29 Jullu 2026 (TATOLI) – Uma-kain 40-resin iha aldeia Lesu, suku Sanirin, postu administrativu Balibó, munisípiu Bobonaru, dezde independénsia seidauk asesu liña eletrisidade.
Xefe Suku Sanirin, Francisco Reis Tavares, hateten aldeia ne’e izolada no ho situasaun ne’e halo komunidade uza de’it lampu tradisionál iha tempu kalan no difikulta labarik sira atu estuda.
Nia dehan, nu’udar autoridade lokál, hato’o ona pedidu ba autoridade munisipál atu haree kestaun ne’e liuhusi Projetu Dezenvolvimentu Integradu Munisipál (PDIM), maibé seidauk iha rezultadu.
“Husu Governu atu tau-matan ba komunidade nia preokupasaun kona-ba liña eletrisidade”, nia hato’o.
Suku Sanirin iha aldeia tolu hanesan Lesu, Palaka no Kaku, ho uma-kain 665 no populasaun hamutuk 2.665.
Hatán ba kestaun ne’e, Sekretáriu Administrasaun no Finansa Munisípiu Bobonaru, Domingos da Costa, hateten iha munisípiu ne’e iha aldeia tolu mak seidauk asesu eletrisidade. Autoridade nafatin esforsu hodi ko’alia ho Eletrisidade de Timor-Leste, Empreza Públika (EDTL, E.P) atu tau-matan ba preokupasaun referida no hein katak tinan ne’e bele rezolve ona.
Jeografikamente, Bobonaru mak hanesan munisípiu ida husi Timor-Leste, lokaliza iha parte oeste, ne’ebé halo fronteira ho munisípiu Ermera ho Ainaru (leste), Kovalima (súl), Indonézia (oeste) no Likísa (norte). Munisípiu referidu iha postu administrativu neen Atabae, Balibó, Bobonaru, Kailaku Lolotoe no Maliana, ho suku 50 no aldeia 193.
Demografikamente, Bobonaru iha totál populasaun 99.956 (projesaun 2019) no densidade populasaun mak 72,38 ba área 1,380.82 km2. Grupu populasaun ida-ne’e ko’alia li-tetun, bunak no kemak.
Pontu interese husi munisípiu Bobonaru inklui Bee Manas iha Marobo, tasi-ibun Atabae, fonte portugués iha Balibó, ai-laran lulik iha Balibó, foho Loelako, mota Pisigi iha Lolotoe ho seluk tan.
Jornalista: Nelson de Sousa
Editora: Maria Auxiliadora
