Voluntáriu JOCV aprezenta rezultadu servisu tinan rua iha Timor-Leste
DILI, 29 Jullu 2026 (TATOLI) – Ajénsia Kooperasaun Internasionál Japaun (JICA, sigla Inglés), kuarta ne’e, realiza aprezentasaun finál ba serbisu membru voluntáriu na’in-rua husi Japan Overseas Cooperation Volunteers (JOCV) ne’ebé remata ona sira-nia misaun voluntáriu durante tinan rua iha Timor-Leste.
Aprezentasaun ne’e hala’o iha Timor Plaza, Dili, no voluntáriu na’in-rua uza lian Tetun atu fahe rezultadu husi atividade sira-ne’ebé sira hala’o durante sira-nia misaun.
Voluntáriu Shoki Ojiro, halo aprezentasaun ba ninia kanaar nu’udar fisioterapeuta iha Centru Reabilitasaun Nasionál (CNR) Becora. Enkuantu, Yuka Shudo hato’o aprezentasaun kona-ba ninia serbisu Voluntáriu nu’udar espesialista nutrisaun hodi apoia programa merenda eskolár iha Eskola Bázika Dominican, Hera.
Shoki Ojiro hateten katak durante serbisu voluntáriu iha Timor-Leste, nia nota katak Timor-Leste sei menus rekursu umanu liuliu fisioterapeuta. Nia fó ezemplu, iha CNR, sei menus fisioterapeuta hodi responde ba nesesidade pasiente ne’ebé kontinua aumenta.
“Lori JICA no JOCV nia naran, ami hato’o obrigadu ua’in ba staff CNR, ministériu saúde no povu Timor-Leste ne’ebé durante ne’e servisu hamutuk ho ami atu hadi’a kualidade servisu fisioterapia iha CNR,” Shoki dehan durante aprezentasaun.
Iha okaziaun ne’e, Reprezentante JICA iha Timor-Leste, Daisuke Fukumori, hateten katak membru JOCV na’in-rua ne’e kompleta ona sira-nia misaun voluntáriu no aprezentasaun finál sai etapa ikus molok sira fila ba Japaun.
“Importante atu aprende husi esperiénsia voluntáriu sira hodi hadi’a programa JOCV iha futuru. Programa ida-ne’e sei kontinua iha Dili no munisípiu sira seluk, no ami enkoraja voluntáriu sira atu kontinua kontribui ba dezenvolvimentu Timor-Leste,” Daisuke dehan.
JOCV mak programa voluntáriu internasionál ida ne’ebé JICA jere hodi haruka voluntáriu joven Japaun sira ba nasaun sira-ne’ebé dezenvolve-an hela.
Programa ne’e permite voluntáriu sira uza sira-nia koñesimentu no abilidade atu apoia dezenvolvimentu iha área oioin, inklui edukasaun, saúde no dezenvolvimentu juventude.
Desde inísiu to’o agora, voluntáriu JOCV na’in-45 resin mak servisu one iha Timor-Leste, kontribui ba organizasaun no instituisaun oioin iha setór edukasaun, saúde no dezenvolvimentu nasionál.
Jornalista: Camilio de Sousa
Editór: Filomeno Martins
