MCAE no SEI hahú konsultasaun nasionál ba Estratéjia Empoderamentu Ekonómiku Feto
DÍLI, 30 Jullu 2026 (TATOLI) – Ministériu Koordenadór ba Asuntu Ekonómiku (MCAE), hamutuk ho Sekretaria Estadu ba Igualdade (SEI), ho apoiu husi Australian Aid liuhosi programa Partnerships for Inclusive Prosperity (PROSIVU), hala’o iha loron Kinta Kolókiu Nasionál ida ho tema “Konsultasaun ba Dezenvolvimentu Estratéjia Empoderamentu Ekonómiku Feto iha Timor-Leste.”
Kolókiu ne’e atu halibur hanoin husi ministériu relevante sira, parseiru dezenvolvimentu, organizasaun sosiedade sivíl, setór privadu no reprezentante komunidade sira, hodi prepara Estratéjia Nasionál Empoderamentu Ekonómiku Feto ne’ebé inkluzivu no sustentável.
Xefe Seksaun Apoiu Setór Privadu no Strategic Unit for Economic Integration (SUEI) iha MCAE, Heminia de Deus, dehan kolókiu ne’e ninia objetivu mak dezenvolve estratéjia ida ne’ebé bele haforsa empoderamentu ekonómiku feto liuhosi konsultasaun ho parte interesada sira.
“Nia objetivu mak identifika oportunidade no dezafiu ne’ebé feto sira hasoru bainhira partisipa iha atividade ekonómika. Konsultasaun ida ne’e mós atu halibur ideia, esperiénsia no rekomendasaun husi ministériu relevante, parseiru dezenvolvimentu, organizasaun sosiedade sivíl, setór privadu no reprezentante komunidade sira hodi determina prioridade estratéjika, inklui hasa’e asesu ba finansas, formasaun, merkadu, teknolojia no oportunidade negósiu,” dehan Heminia ba jornalista sira iha Otél Timor, Colmera, Dili.
Iha oportunidade hanesan, Koordenadór SUEI, Leonito S. de Jesus, hateten katak kolókiu ne’e importante atu hametin koordenasaun entre Governu, parseiru dezenvolvimentu no setór relevante sira hodi prepara no implementa Estratéjia Empoderamentu Ekonómiku Feto.
“Tuir esperansa, kolókiu ida ne’e sei produz rekomendasaun polítika no planu asaun ne’ebé bele sai baze ba implementasaun Estratéjia Nasionál Empoderamentu Ekonómiku Feto iha Timor-Leste,” dehan Leonito.
Enkuantu, Diretór-Jerál SEI, Armindo da Costa, hateten empoderamentu ekonómiku feto la’ós de’it kona-ba aumenta rendimentu ka partisipasaun iha merkadu traballu.
“Empoderamentu ekonómiku feto signifika fó kapasidade ba feto sira atu halo desizaun kona-ba sira-nia moris ekonómika rasik, asesu ba rekursu produtivu, formasaun, finansas, merkadu no oportunidade emprezáriu sira, nune’e bele kontribui di’ak liután ba bem-estar família no dezenvolvimentu nasionál,” nia dehan.
Armindo mós salienta katak konsultasaun ida ne’e importante tebes tanba fó oportunidade ba parte hotu-hotu atu kontribui ideia, esperiénsia no rekomendasaun sira, atu garante katak estratéjia ne’ebé sei dezenvolve responde duni ba realidade no nesesidade feto Timor-Leste iha kontestu oioin.
Nia reafirma katak SEI sei kontinua servisu hamutuk ho MCAE no parseiru relevante sira atu apoia prosesu dezenvolvimentu, implementasaun no monitorizasaun Estratéjia Empoderamentu Ekonómiku Feto.
“Mai ita hamutuk harii vizaun ida ne’ebé inkluzivu, sustentável no transformativu ba feto Timor-Leste sira. Tanba bainhira feto avansa signifika família mós avansa, komunidade avansa no nasaun mós avansa,” konklui Armindo.
Jornalista: Camilio de Sousa
Editór: Filomeno Martins
