Ministru Justisa no Vise Sekretáriu-Jerál ASEAN hakarak reforsa setór justisa
DILI, 30 Jullu 2026 (TATOLI)–Ministru Justisa, Sergio Hornai simu audiénsia husi Vise Sekretáriu-Jerál ba Komunidade Polítika no Seguransa Asosiasaun Nasaun Sudeste Aziátiku (ASEAN), Dato’ Astanah Abdul Aziz, hodi ko’alia kona-ba reforsa setór justisa.
“Ministériu Justisa hetan vizita importante ida husi Vise-Sekretáriu Jerál ASEAN mai pur kosidénsia partipa atividade balun ne’ebé hala’o husi ita-nia instituisaun relevante sira iha formasaun kona-ba justisa, seguransa no direitus umanus ninian, liliu ba funsionamentu área defeza nomós ba polítika seguransa no defeza. Entaun, ami aborda buat balun, liliu iha Law Enforcement oinsá mak Ministériu Justisa bele haree hodi bele kontribui maka’as liután ba ita-nia adezaun, atu haree kona-ba matéria sira ne’ebé iha kooperasaun matéria internasionál penál,” Ministru Sergio hateten ba Jornalista sira hafoin simu audiénsia, iha nia Gabinete, Kolmera, Kinta ne’e.
Notísia relevante: TL-Malázia diskute dezafiu no preparasaun TL atu integra ba ASEAN
Aleinde ne’e, Ministru ho nia bainaka halo mós diskusaun kona-ba pilár prinsipál tolu hanesan defeza seguransa, ekonómika no sosiál kulturál, ho interrasaun entre sidadaun ida ba sidadaun seluk ba mobilidade iha rejiaun ASEAN.
“Ohin ami aborda mós oinsá mak ita bele garante no haree ba vizaun boot iha estatutu ASEAN atubele haree Timor-Leste nia orientasaun polítika sira iha Law Enforcement atu halo adaptasaun ba vizaun boot ASEAN,” nia akresneta.
Husi enkontru ne’e mós troka impresaun no hanoin ba malu atubele husu asisténsia husi Sekretáriuadu ASEAN, liuhusi Vise Sekretáriu-Jerál atubele fó apoiu iha nível tékniku ASEAN, liliu The ASEAN Senior Law Officials Meeting (ASLOM), ne’ebé husi Diretór no Diretór Jerál iha diskusaun área ne’ebé temátika liu iha serbisu tékniku nian.
Ko’alia mós oinsá husu disponibilidade Vise Sekretáriu-Jerál hodi fó asisténsia ba Timor-Leste, liliu reuniaun altu nível Ministru Justisa husi país ASEAN ka The Twelfth ASEAN Law Ministers’ Meeting (ALAWMM), ne’ebé haree ba Ministru Justisa lubun husi país membru hodi diskute kona-ba asuntu sira ne’ebé iha relasionamentu ba ASEAN ninia interrese.
“Ohin sira mós fó hanoin nafatin oinsá mak ita bele halo serbisu iha polítika no vizaun ASEAN bainhira iha interrasaun sira iha bilaterál nomós iha reuniaun multilaterál tantu iha nível tékniku tenke liuhusi odamatan ida para buat hotu rejistradu no buat hotu la’o tuir hanesan saida maka define ona iha padraun sira ne’ebé estabelese ba interrese komun ASEAN,” Ministru subliña.
Jornalista : Natalino Costa
Editora : Julia Chatarina
