Portugál-TL diskute kona-ba setór produtivu ne’ebé fó benefísiu ba povu
DILI, 30 Jullu 2026 (TATOLI)—Primeiru-Ministru, Kay Rala Xanana Gusmão hala’o enkontru ho Ministru Ekonomia no Koezaun Territoriál Portugál, Manuel Castro Almeida, hodi diskute kona-ba setór produtivu ne’ebé bele fó benefísiu ba povu.
“Ha’u haksolok tebes tanba bele halo konversa ida ho Primeiru-Ministru Kay Rala Xanana Gusmão,” Ministru Ekonomia no Koezaun Territoriál Portugál, Manuel Castro Almeida, hateten ba jornalista sira iha Palásiu Governu, ohin.
Ministru ne’e deklara katak sira ko’alia dahuluk liu kona-ba CPLP no importánsia CPLP ba ita hotu. Sira iha hanoin ne’ebé hanesan atu prioriza liután kooperasaun membru nasaun CPLP iha área oioin.
Nia hatutan, aban sei iha enkontru ho Ministru Turizmu husi nasaun membru CPLP sira, ne’ebé sei diskute iha área oioin ne’ebé presiza atu hametin liután kooperasaun.
“Ami mós ko’alia kona-ba dalan ne’ebé Governu Portugál no Timor-Leste atu hadi’a povu sira-nia moris. Ami mós ko’alia kona-ba oinsá nasaun rua ne’e bele servisu hamutuk liuliu iha área formasaun profisionál,” nia dehan.
Governante ne’e dehan, Portugál agora falta traballadór no Timor-Leste hasoru dezáfiu kona-ba dezempregu. Tanba ne’e, formasaun profisionál bele sai hanesan dalan ida atu hametin kooperasaun entre nasaun rua ne’e hodi fó benefísiu ba povu.
“Ami mós ko’alia kona-ba asuntu internasionál sira no preokupasaun ne’ebé Timor-Leste iha. Timor-Leste kontinua hatudu nia kompromisu atu kontribui ba dame, hamenus tensaun no promove kooperasaun di’ak entre komunidade internasionál tomak,” nia dehan.
Nia hatutan, ikus liu sira ko’alia mós kona-ba podér lokál no sira diskute mós kona-ba vontade Governu atu hametin podér lokál no aproxima liután podér desizaun ba fatin sira-ne’ebé problema sira akontese.
“Iha oportunidade ne’e ami mós haree esperiénsia Portugál nian iha área oioin no oinsá esperiénsia refere bele fó benefísiu ba Timor-Leste. Tanba ida-ne’e maka vantajen boot husi podér lokál, aproxima desizaun ba komunidade no ba fatin ne’ebé presiza solusaun,” nia hateten.
Jornalista : Alexandra da Costa
Editór : Cancio Ximenes
