Sekretáriu Jerál ASEAN-PM Xanana diskute seguransa Estadu
DILI, 30 Jullu 2026 (TATOLI)—Primeiru-Ministru, Kay Rala Xanana Gusmão, hala’o enkontru ho Adjuntu Sekretáriu Jerál ASEAN, Dato Astanah Abdul Aziz no ekipa delegasaun hodi diskuti kona-ba seguransa Estadu.
Primeiru-Ministru, Kay Rala Gusmão, hateten ekipa delegasaun sira-ne’e hala’o enkontru hahú husi horisehik, kuarta (29 jullu 2026) iha Ministériu Negósiu Estranjeiru no Kooperasaun (MNEK) no ohin kontinua to’o sábadu (01 Agostu 2026).
“Enkontru ne’e kompostu husi Sekretária ASEAN nian iha Jakarta, Vice- Sekretária ASEAN no delegasaun lubuk ida husi Filipina, Indonézia no Brunei Darusallam ne’ebé sira mai diskute ho ita-nia instituisaun sira kona-ba seguransa Estadu,” Primeiru-Ministru, Kay Rala Xanana Gusmão, hateten ba jornalista sira iha sala enkontru Gabinete Fronteira Maritima no Terrestre, Palásiu Governu, ohin.
Xefe Governu dehan, ekipa delegasaun sira-nia prezensa ajuda tebes tanba sira hakarak fó apoiu tomak ba Timor-Leste nia integrasaun iha ASEAN.
Ida-ne’e, tuir nia, sai hanesan buat ruma neʼebé bele kapasita no fó kbi’it atu hanoin hodi partisipa másimu iha integrasaun ASEAN.
“Ne’e dunia, ha’u hasoru sira no ha’u sente katak lalika kontinua ko’alia ona tanba sira iha ne’e hanesan vizita ida, nune’e bainhira termina ona sira-nia vizita mak MNEK sei bolu imi hodi esplika saida de’it mak ita diskute,” nia dehan.
Jornalista : Alexandra da Costa
Editór : Cancio Ximenes
