SSK Kailaku intensifika tratamentu preventivu tuberkuloze ba membru família
BOBONARU, 30 Jullu 2026 (TATOLI) – Sentru Saúde Komunitária (SSK) postu administrativu Kailaku, munisípiu Bobonaru, rejista pasient tuberkuloze (TB) sia, ne’ebé daudaun halo hela tratamentu, tanba ne’e ekipa saúde kontinua intensifika tratamentu preventivu tuberkuloze (TPT) ba membru família hodi prevene transmisaun moras ne’e.
Xefe SSK Kailaku, Lourenço Moniz, hateten katak moras tuberkuloze mak moras infesioza ida ne’ebé kauza husi baktéria Mycobacterium tuberculosis. Tanba ne’e, servisu saúde kontinua implementa estratéjia prevensaun ba ema sira ne’ebé hela iha uma ida ho pasiente TB.
“Ita iha kazu sia ne’ebé halo hela tratamentu. Ita fó mós tratamentu preventivu tuberkuloze ba membru uma-kain hotu, tanba bainhira iha ema ida iha uma-laran hetan moras TB, membru família sira mós iha risku atu afeta”, Lourenço dehan ba jornalista sira kinta-feira ne’e
Nia esplika katak TPT la’ós atu kura ema ne’ebé moras ona, maibé atu prevene baktéria ne’ebé iha ema nia isin atu la dezenvolve sai moras TB ativa.
“Iha uma-laran ne’e donte infesaun iha, ita tenke hakotu transmisaun ho tratamentu preventivu, antes nia hamosu moras tuberkuloze, hemu ona ai-moruk prevensaun, nune’e baktéria ne’e labele dezenvolve-an sai fali tuberkuloze”, nia dehan.
Lourenço hateten tan katak atualmente tratamentu ba pasiente TB dura de’it fulan neen ba labarik no ema boot, kompara ho sistema uluk ne’ebé presiza fulan ualu.
Maski nune’e, nia husu ba pasiente sira atu hemu ai-moruk tuir orientasaun profisionál saúde no labele hakotu tratamentu iha klaran, tanba kondisaun ne’e bele hamosu TB rezistente ba ai-moruk (MDR-TB).
“Se pasiente la hemu ai-moruk ho rotina, baktéria bele sai rezistente. Bainhira akontese ona, tratamentu sei sai espesífiku liu no bele dura fulan ualu to’o tinan ida”, katak.
SSK Kailaku kontinua apela ba komunidade atu halo detesaun sedu, buka tratamentu lalais no fó apoiu ba membru família sira atu kumpre tratamentu to’o remata, hodi hakotu transmisaun moras tuberkuloze iha komunidade.
Tuberkuluze mak vírus ida-neʼebé hada’et husi baktéria Mycobacterium tuberculosis, ne’ebé afeta liuliu pulmaun, maibé bele mós afeta parte seluk husi isin.
Notísia relevante: Bobonaru rejista pasiente moras TBC 400-resin
Sintoma prisipál sira inklui me’ar beibeik liu semana tolu, me’ar-tasak kahur ho raan; hirus-matan moras, sente isin kolen hela de’it; isin-manas no kosar iha kalan no laiha vontade atu han halo isin tun maka’as.
Atu prevene morsa ne’e, komunidade rekomenda bá sentru saúde ne’ebé besik bainhira iha sintoma, taka ibun bainhira fani ka me’ar, labele tafui kabeen arbiru; habai kolxaun semana ida dala-ida, loke janela atu anin no loromanas bele tama no sai, han hahán neʼebé di’ak, ezemplu modo, ai-fuan, na’an, susubeen no seluk tan, fase-liman ho sabaun molok han no depoizde halo atividade.
Notisía relevante: SSK Kailaku rejista pasiente tuberkuloze 19
Jornalista: Sergio da Cruz
Editora: Maria Auxiliadora
