TL-Mosambike hametin kooperasaun iha área turizmu
DILI, 30 Jullu 2026 (TATOLI)–Sekretáriu Estadu Asuntu Turizmu Repúblika Mosambike, Fredson Bacar, hala’o enkontru bilaterál ho Vise Primeiru-Ministru, Koodenadór Asuntu Ekonómiku no Ministru Turizmu no Ambiente, Francisco Kalbuadi Lay, hodi diskute kona-ba oportunidade atu hametin kooperasaun iha área turizmu entre nasaun rua.
“Obrigadu barak ba oportunidade ida-ne’e atu hasoru malu no hala’o audiénsia ida-ne’ebé foin ramata. Enkontru ida-ne’e hala’o iha espíritu amizade no kooperasaun, no ami hakarak hato’o agradese no valoriza relasaun amizade no kooperasaun ne’ebé di’ak entre povu rua, Governu rua no nasaun rua, Mosambike no Timor-Leste,” Fredson Bacar dehan ba jornalista sira iha Faról, ohin.
Nia afirma, ba dahuluk Mosambike partisipa iha Enkontru Ministru Turizmu CPLP, ne’e sai oportunidade di’ak atu diskute hamutuk dezenvolvimentu setór turizmu iha nasaun sira-ne’ebé uza lian ofisiál Portugés.
“Dala dahuluk ami mai iha ne’e atu partisipa iha Enkontru Ministru Turizmu CPLP, ne’ebé sai hanesan oportunidade ida atu diskute dezenvolvimentu turizmu iha komunidade nasaun sira-ne’ebé uza lian ofisiál Portugés. Ami hein katak husi enkontru ida-ne’e ita bele hamutuk kria estratéjia sira atu dezenvolve setór turizmu iha rejiaun,” nia esplika.
Mosambike no Timor-Leste iha kondisaun di’ak atu hametin kooperasaun tanba fahe karaterístika hanesan.
“Ami komprende katak nasaun rua ne’e iha karakterístika hanesan: ita fahe lian ida de’it, Portugés; ita mós iha istória komun kona-ba luta ba autodeterminasaun; no ita mós iha esperiénsia koloniál hanesan. Tanba ne’e, iha kondisaun di’ak atu hametin kooperasaun iha área turizmu,” nia dehan.
Sekretáriu Estadu ne’e mós hato’o nia espetativa katak kooperasaun iha área turizmu bele fó impaktu ba dezenvolvimentu ekonomia no ba juventude.
“Ami hakarak atu dezenvolve destinu turístiku sira iha nasaun rua. Ami hakarak halo turizmu sai hanesan motor ida ba dezenvolvimentu ekonómiku, tuir mós ajenda dezenvolvimentu Timor-Leste, atu kria servisu ba juventude, aumenta rendimentu ba povu no aumenta reseita ba Estadu. Liuhusi turizmu, ami hakarak fó oportunidade servisu ba joven sira no ajuda dezenvolve nasaun rua,” nia dehan.
Tanba ne’e, Bacar hato’o agradesimentu ba Vise-Primeiru-Ministru, Francisco Kalbuadi Lay tanba simu nia delegasaun no prontu hamutuk foti pasu konkretu sira ba futuru.
“Tanba ne’e, Señor Ministru, dala ida tan, ha’u hakarak hato’o obrigadu ba onra ne’ebé fó mai ami atu simu no hamutuk foti pasu konkretu sira atu dezenvolve kooperasaun iha área turizmu,” nia hateten.
Jornalista : Hortêncio Sanchez
Editór : Cancio Ximenes
