TL-Portugal asina akordu kooperasaun formasaun iha área turizmu
DILI, 30 Jullu 2026 (TATOLI)–Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, hala’o enkontru ho ho Ministru Ekonomia no Koezaun Territoriál Portugal, Manuel Castro Almeida no Adjunta Ministru, Ana Sofia, hodi diskute oportunidade hodi hametin relasaun no kooperasaun ekonómika entre nasaun rua.
Iha enkontru ne’e, Vise-Primeiru-Ministru Francisco Kalbuadi Lay no Ministru Ekonomia no Koezaun Territoriál Portugal Manuel Castro Almeida asina akordu kooperasaun kona-ba formasaun iha área turizmu ba períodu 2026-2028.
Akordu ne’e ho objetivu atu hasa’e kapasidade rekursu umanu Timor-Leste nian iha setór turizmu, hodi suporta dezenvolvimentu destinu turístiku sustentavel iha rai laran.
Governu Timor-Leste no Portugal kompromete nafatin hodi hametin kooperasaun bilaterál, liu-liu iha área ekonómia, investimentu no turizmu ba benefísiu povu nasaun rua nian.
Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, hateten Portugal sai parseiru importante ida ba Timor-Leste. Nia afirma Governu kontinua valoriza kooperasaun ne’ebé durante ne’e fó ona kontribuisaun ba dezenvolvimentu nasaun.
“Portugal hanesan parseiru importante ida ba Timor-Leste, no Governu kontinua valoriza kooperasaun ne’ebé durante ne’e fó kontribuisaun ba dezenvolvimentu nasaun. Kompromisu Governu nian mak atu habelar relasaun ekonómika no kria oportunidade foun ba investimentu no kreximentu sustentável,” Kalbuadi Lay hateten.
Enkontru ne’e hala’o iha Gabinete Vise-PM, Farol, Díli, kinta ne’e, ho objetivu atu aprofunda kona-ba dezenvolvimentu ekonómiku, investimentu, komérsiu, turizmu no área sira seluk ne’ebé bele fó benefísiu ba Timor-Leste no Portugál.
Ministru Ekonomia no Koezaun Territoriál Portugal, Manuel Castro Almeida, hato’o apresiasaun ba relasaun di’ak entre nasaun rua.
Nia manifesta prontidaun atu kontinua servisu hamutuk ho Timor-Leste hodi promove dezenvolvimentu ekonómiku, hametin kapasidade institusionál no aumenta kooperasaun iha setór prioridade sira.
Nia subliña katak turizmu sai setór importante atu dezenvolve hamutuk, tanba iha Portugál reseita turístika boot tebes hodi valoriza rekursu lokál sira.
{Ida-ne’e atu prezerva ita-nia kultura, ita-nia tradisaun no jere atrasaun turístika no jere turizmu ba kualidade nian. Ne’ebé, aposta iha turizmu nu’udar fonte kriasaun ba valór rendimentu,” Manuel Castro Almeida hateten.
Jornalista : Hortêncio Sanchez
Editór : Cancio Ximenes
