Treinadór futeból na’in-24 husi Asosiasaun Munisípiu termina formasaun iha FFTL
DILI, 30 Jullu 2026 (TATOLI)–Treinadór futeból hamutuk na’in-24 husi Asosiasaun Futeból Munisípiu konklui ona formasaun ne’ebé organiza husi Federasaun Futebol Timor-Leste (FFTL) liuhusi Diresaun Téknika.
Formasaun ne’e hala’o durante loron lima, hahú husi loron 24 to’o 28 fulan-Jullu 2026 iha Dili.
Formasaun ne’e fahe ba parte rua mak iha dadeer partisipante sira aprende matéria téoria no iha parte lorokraik ne’e mak hala’o prátika iha kampu.
Formadór ne’ebé fó formasaun ba partisipante sira mak Jose Ariston Caslib husi FIFA.
Iha serimónia enseramentu, Membru Ezekutivu FFTL, Domingos Cairo, agradese ba partisipante no ekipa tékniku sira-ne’ebé konsege servisu hamutuk hodi realiza formasaun ho susesu.
Nia dehan, formasaun ne’e sai responsablidade ida ba treinadór sira-ne’ebé partisipa.
“Formasaun ne’e hanesan responsablidade ida ba ita-boot sira-ne’ebé partisipa, tanba ne’e husu atu fila ba munisípiu kontinua absorve matéria ne’ebé aprende ona hodi halibur labarik kiik-oan sira atu ezerse sira-nia talentu iha futeból ho kualidade,” Domingos Caeiro hateten.
Nia mós subliña katak formasaun ne’e sai referénsia ba treinadór sira atu sai modelu foun ida ba dezenvolvimentu futeból iha baze hodi prodús jogadór di’ak iha futuru.
“Espera parte tékniku sira servisu hamutuk ho Asosiasaun Treinadór Futebol Timor-Leste atu nafatin monitoriza ba treinadór sira-nia servisu ba dezenvolvimentu talentu kiko’an sira-nian iha baze, hodi bele garante ba kualidade jogadór sira-nian iha futuru,” nia hatutan.
Alende ne’e, Diretór Kompetisaun FFTL, João F. Campos, parabeniza partisipante sira-ne’ebé oferese ona tempu hodi mai hasa’e koñesimentu liuhusi formasaun durante loron lima nia laran.
FFTL mós kompromete nafatin organiza formasaun hanesan ne’e ba Asosiasaun Futeból sira.
Tanba federasaun ne’e dezeña ona programa anuál ida-ne’ebé responsabiliza husi Diresaun Kompetisaun kona-ba dezenvolve talentu futebol iha kada Asosiasaun Futebol Munisípiu. Programa ne’e hanaran Copa Juvenil sub-15 no sub-17 ba Mane no Feto.
“Husi programa ne’e ho objetivu esensiál ida mak oinsá atu fó kontinuidade ba preparasaun talentu kiko’an sira nian ho kualidade hodi sustenta ba Seleasaun Nasionál iha futuru,” nia dehan.
FFTL konsidera katak atu garante produsaun jogadór ne’ebé kualidade ba futuru, presiza mós hasa’e koñesimentu treinadór sira nian liuhusi formasaun sira hodi sai mós promotor ba dezenvolvimentu futebol iha Timor-Leste.
“Tanba ne’e, husu ba treinadór sira atu nafatin aproveita ba oportunidade sira atu kontinua kapasita aan iha área futebol nian. Espera ho preparasaun hirak ne’e bele garante dezenvolvimentu futebol iha Timor-Leste sai dezenvolvidu di’ak liu tán iha futuru,” nia esplika.
Jornalista : Hortêncio Sanchez
Editór : Cancio Ximenes
