ADN rekomenda ona pedidu pagamentu millaun $75 ba empreza 410
DILI, 31 Jullu 2026 (TATOLI)—Diretór Ezekutivu Ajénsia Dezenvolvimentu Nasionál (ADN), Januário Guterres, hateten iha trimestre daruak hahú husi Janeiru-Jullu 2026 ne’e ADN rekomenda ona pedidu pagamentu ba empreza 410 ho orsamentu hamutuk millaun $75.
“Kona-ba servisu inspesaun no verifikasaun ho totál dokumentu ne’ebé ADN verifika hamutuk 359. Projetu barak liuhusi estrada rurál no eskola, ne’ebé mak balun tama ona faze konkursu públiku no balun asina ona kontratu hodi hein implementasaun,” Diretór Ezekutivu ADN informa ba Agência Tatoli iha nia kna’ar fatin, Hudi Laran, ohin.
Pedidu pagamentu sei tama barak bainhira tama iha trimestre daruak, enkuantu pedidu pagamentu depende ba ADN nia monitorizasaun.
Nia dehan, bainhira ADN karik deteta obra ho kualidade entaun ADN rekomenda kedas ba pagamentu, karik obra ladi’ak mak ADN sei rekomenda atu kompañia hadi’a tiha lai mak hafoin halo pagamentu.
“Durante ami-nia monitorizasaun ladun deteta ona implementasaun projetu ne’ebé ladun ho kualidade di’ak (menus ona), tanba ita halo intervensaun hela de’it no traballadór sira mós hahú hatudu sira-nia servisu ho di’ak. Maske balun sei nafatin komete infrasaun maibé iha inísiu kedas ita haruka sira hadi’a,” nia dehan.
Tanba, nia esplika, bainhira kompañia sira halo servisu atraza uitoan maibé ho kualidade di’ak ne’e Governu sei fó apresiasaun, maibé halo obra ida ho lalais no laiha kualidade ne’e mak sai problema.
Jornalista : Alexandra da Costa
Editór : Cancio Ximenes
