Jestór Balkaun Úniku Baukau klarifika kauza odamatan estragu
BAUKAU, 31 Jullu 2026 (TATOLI)—Jestór Balkaun Úniku Munisipál Baukau klarifika kauza odamatan husi Balkaun Úniku hetan estragu tanba komunidade hadau malu numéru atendimentu iha loron trata Billete Indentidade (BI).
Kordenadór Balkaun Úniku Munisipál Baukau, Euclides Ornai, esplika kazu referida akontese iha loron Tersa (28/07/2026) purvolta dadeer tuku 07:00 Otl. Nia parte la haree direta akontesimentu ne’e maibé liuhusi relatóriu ne’ebé relata katak kauza ba akontesimentu referidu bainhira sidadaun sira dudu malu hodi rezulta odamatan (vidru) rahun tanba hadau numéru seña (nomor antrian) atu trata BI.
“Bainhira portaun loke entaun sidadaun sira hadau fatin iha liña dahuluk, maibé dudu malu entaun akontese odamatan nia vidru rahun,” Koordenadór Balkaun Úniku Baukau informa ba TATOLI iha ninia kna’ar fatin, Vila Nova, Baukau, Sesta ne’e.
Euclides Ornai relata Balkaun Úniku halo jestaun ba mákina imprime no fahe loron atendimentu ba sidadaun sira tanba asegura sustentabilidade serbisu iha-ne’ebé antesipa mosu mákina avaria nune’e deside halo limitasaun ba atendimentu hanesan kada loron simu sidadaun mínimu 60 no másimu 80.
Aleinde ne’e, razaun seluk Balkaun Úniku nu’udár sentru atendimentu úniku iha-ne’ebé futuru sei halo serbisu hotu relasiona ho dokumentu sidadaun nune’e daudaun ne’e fahe oráriu kada semana husi Segunda to’o Tersa halo atendimentu ba BI no loron rua seluk Kuarta no Kinta halo bom komportamentu ka sertidaun rejistu kriminál no iha loron Sesta simu dokumentu.
“Ita halo jestaun mezmu simu ema 60 to’o 90 maibé ita asegura katak mákina seguru nafatin hodi kontinua halo atendimentu ba sidadaun sira maibé akontesimentu ne’e tanba ema barak entaun ita la deskobre pesoál maibé relatóriu ita relata ona ba institusaun relevante sira,” Euclides Ornai akresenta.
Balkaun Úniku Baukau mós hahú fulan-Juñu koloka atendimentu iha kada postu administrativu ne’ebé semana dahuluk iha postu tolu hanesan Kelikai, Kelikai Antigu no Matebian, semana daruak iha Laga no Baguai, semana datoluk iha Venilale no Vemasse, enkuantu postu administrativu Baukau Vila iha finde Jullu ne’e.
Entretantu, tuir dadus, Balkaun Úniku Baukau prodús ona kartaun BI hamutuk rihun sanulu (10) iha-ne’ebé totál funsionáriu hamutuk na’in-lima kompostu husi koordenadór, motorista, pesoál ofisiál na’in-rua no seguransa na’in-ida.
Jornalista: Natalino Belo
Editór: Xisto Freitas da Piedade
