Jornalista TL vizita Aldeia Dong haree direta rikeza kultura-arte tradisionál
LIUZHOU, 31 Jullu 2026 (TATOLI)—Delegasaun jornalista na’in-24 husi Timor-Leste ne’ebé akompaña husi China International Communications Group (CICG), vizita direta Aldeia tradisionál komunidade Dong nian iha sidade Liuzhou, Rejiaun Guangxi, ne’ebé kontinua atrai vizitante liuhusi rikeza kultura, arkitetura únika no arte tradisionál ne’ebé preserva durante sékulu sira.
Aldeia Dong sira liuliu iha Sanjiang Dong Autonomu County, Liuzhou, koñesidu ho uma tradisional madeira, torre tambór (drum tower), ponte “vento no udan” (wind-and-rain bridge) no moris komunidade ne’ebé sei mantein tradisaun lokál.
Turista sira bele haree diretamente arte tradisionál hanesan dansa, kantu folklór Dong, opera tradisionál, artezanatu no kostume tradisionál. Kanta tradisionál Dong no aprezentasaun kultura sai ponte importante atu transmite istória no identidade komunidade ba jerasaun foun.
Arkitetura Aldeia Dong mós sai atrasaun boot ida, ho uma ai nian ne’ebé harii iha rai aas, ponte tradisionál no torre tambór ne’ebé sai sentru atividade sosiál no festival komunidade. Elementu sira-ne’e hatudu relasaun forte entre povu Dong, natureza no sistema moris rurál.
Iha tinan sira ikus, Liuzhou dezenvolve turizmu bazeia ba kultura atu fó oportunidade ekonómika ba komunidade lokál, enkuantu kontinua proteje patrimóniu kulturál.
Área Chengyang Bazhai kompostu husi Aldeia Dong, sai destinasaun ida-ne’ebé populár ba vizitante nasionál no internasionál atu esperimenta kultura autentika Dong.
Aldeia Dong iha Liuzhou la’ós de’it fatin turizmu maibé mós fatin ne’ebé rai hela istória, arte no tradisaun povu ida-ne’ebé kontinua moris iha mundu modernu.
Jornalista : Felicidade Ximenes
Editór : Cancio Ximenes
