Komunidade Suku Uaitame loke estrada foun liga bá área Uailalika

VIKEKE, 31 Jullu 2026 (TATOLI)—Autoridade lokál hamutuk ho komunidade husi Suku Uaitame ho inisiativa loke estrada foun husi Aurelisi bá Uailalika atu fasilita movimentasaun komunidade.

“Kona-ba loke estrada ne’e foin lalais ami enkontru hamutuk ho ita-nia komunidade, depoiz iha enkontru ne’e mak deside hamutuk ami mak hamoos uluk tiha estrada foun ne’e. Nune’e, horisehik ami konsege hamoos hotu purvolta kilómetru haat (4) ho nia luan metru lima (5). Orsida mak ami kontinua ke’e fali hodi halo tetuk para karreta no motorizada sira bele asesu,” Xefe Aldeia Makadike, Suku Uaitame, João Pinto ba TATOLI liuhusi telefónika, Sesta ne’e.

Autoridade ne’e dehan estrada ne’e bainhira di’ak sei fasilita komunidade uma-kain hamutuk 55 husi Suku Uaitame ne’ebé hela iha área Uailika.

“Aleinde fasilita komunidade sira, ita-nia komunidade balun mós hakarak muda sai hodi haki’ak animál tanba hela iha suku laran ne’e rai kloot ona, entaun difikulta ita-nia komunidade haki’ak animál ladi’ak. Tan ne’e mak ami deside hamutuk loke dalan,” nia subliña.

João haktuir durante ne’e dalan liga ba área Uailalika liuhusi mota Bebui, maibé tempu udan mota tun komunidade labele atravesa, depoiz iha área Uailalika semitériu públiku iha área ne’ebá (Uailalika) ne’ebé tempu udan ema ba haloot mate-isin mós labele korta mota.

Iha fatin ketak, Reprezentante Komunidade Uailalika, Alvino Pinto, hateten dalan ne’e komunidade ke’e de’it, ne’ebé tempu udan ne’e bee bele estraga, entaun Governu presiza ta-matan hodi halo di’ak atu fasilita komunidade referida.

Tur dadus, komunidade hela iha área Uailalika kompostu husi Aldeia Makadike no Aldeia Foho-Manu ho totál uma-kain 55 no área Diribu uma-kain 20 resin ho totál populasaun na’in-250.

Jornalista: Vitorino Lopes da Costa

Editór: Xisto Freitas da Piedade