Ministériu Justisa kontinua esforsu hodi halo akizisaun ba blanku dokumentu ofisiál

DILI, 31 Jullu 2026 (TATOLI)—Ministériu Justisa (MJ) kontinua esforsu atu rezolve akizisaun ba Billete Identidade (BI), Sertidaun Moris no Sertidaun Rejistu Kriminál hodi bele emite orijinál ba sidadaun sira.

“Hanesan polítiku, ha’u orienta nafatin atu situasaun sira ne’e labele estagnadu mas tenke la’o ba oin hodi nune’e bele prodús dokumentu sira ne’ebé merese no prodús dokumentu ida-ne’ebé atu iha duni seguransa,” Ministru Justisa, Sergio Hornai, hateten ba Ajénsia TATOLI iha ninia knaar fatin, Kolmera, Sesta ne’e.

Ministru orienta ona ba ekipa aprovizionamentu MJ hodi loke prosesu sira.

“Ita halo nafatin, purtantu ha’u hakarak hateten de’it katak dokumentus saida de’it katak mak sai husi Diresaun Jerál Rejistu Notariadu ne’e dokumentu ofisiál ne’ebé mak emite husi Ministériu Justisa inklui ba iha BI ka Sertidaun Moris sira ne’ebé emite,” nia akresenta.

Notísia relevante : MTK aloka rihun $185 hodi sosa blanku ba karta kondusaun no livrete

Nune’e, Governante ne’e husu ba públiku atu kontinua uza provizóriu dokumentu sira ne’ebé uza suratahan-mutin hodi hein akizisaun ba blanku.

“Forma rua de’it ita fó nafatin sira tahan-mutin hodi hein ba halo transkrisaun ba blanku orijinál. Ita sei halo nafatin, tanba sasán sira ne’e ha’u hanoin katak akizisaun mós lori tempu nafatin. Mas servisu tékniku ita-boot sira bele Diresaun Rejistu Notariadu,” nia katak.

Iha sorin seluk, Diretór Jerál Servisu Rejistu Notariadu Agostino Gonsalves Viera, hateten, kona-ba akizisaun ba BI, husi Diresaun Servisu Rejistu Notariadu submete ona pedidu ba MJ no agora iha hela aprovizionamentu Ministeriu mak sei haree.

“Atu halo akizisaun ne’e aprovizionamentu ministériu mak halo tanba buat hotu husi aprovizionamentu mak responsabliza,” nia katak.

Jornalista     : Natalino Costa

Editora          : Julia Chatarina