Timor-Leste no Angola asina akordu hodi hametin kooperasaun iha setór turizmu
DILI, 31 Jullu 2026 (TATOLI) – Timor-Leste no Angola asina nota entendimentu ida hodi hametin kooperasaun iha setór turizmu, ne’ebé foka ba kapasitasaun rekursu umanu, promosaun konjunta ba destinu turístiku sira, no atrai investimentu.
Dokumentu ne’e asina hosi Ministru Turizmu no Ambiente Timor-Leste nian, Francisco Kalbuadi Lay, no Sekretáriu Estadu Turizmu Angola nian, Augusto Laurindo Kalikemala, iha marjen Reuniaun Ministru Turizmu husi Komunidade País sira Ko’alia Lia-Portugés nian (CPLP) ba da-13, ne’ebé hala’o iha Otél Palm Spring, iha Dili.
Enkontru ministeriál ne’e hala’o ho tema “Natureza, Oseanu, no Kultura Nu’udar Ita-Nia Patrimóniu Turístiku iha nasaun CPLP” no partisipa husi Sekretária-Ezekutiva CPLP, Maria de Fátima Jardim.
Francisco Kalbuadi Lay haktuir katak akordu ne’e sei hametin kooperasaun prátika entre nasaun rua ne’e, partikularmente kona-ba formasaun rekursu umanu no kapasitasaun ba setór turizmu Timor-Leste nu’udar membru foun husi Asosiasaun Nasaun Sudeste Aziátiku (ASEAN).
“Akordu ne’e hanesan importante hodi hametin koperasaun entre Timor-Leste ho Angola, liuliu iha área sira formasaun rekursu umanu nian, ospitalidade, no indústria otelaria nian. Sei kontribui mós hodi dezenvolve kapasidade sira Timor-Leste nian hanesan membru ASEAN nian, hodi permite nasaun aproveita di’ak liu oportunidade sira koperasaun turizmu nian iha rejiaun”, nia hatete.
Responsavel ne’e destaka importánsia husi troka esperiénsia entre nasaun CPLP sira hodi apoia dezenvolvimentu setór turizmu nasionál.
Sekretáriu Estadu Turizmu Repúblika Angola, Augusto Laurindo Kalikemala, esplika katak memorandu ne’e estabelese konjuntu medida sira ho objetivu atu aprofunda kolaborasaun bilaterál iha turizmu.
“Hanesan konjuntu medida konkreta ne’ebé sei permite kooperasaun boot liu entre ita-nia nasaun rua iha área promosaun turizmu konjunta, formasaun forsa traballu, no atrai investimentu ba setór turizmu”, nia realsa.
Tuir responsavel angolanu, akordu prevee kriasaun grupu traballu konjuntu ida ne’ebé kompostu hosi reprezentante sira husi nasaun rua ne’e hodi akompaña implementasaun asaun sira ne’ebé planeada no identifika oportunidade sira ba kooperasaun.
“Ami kria ona ekipa traballu ida ho membru sira husi ami-nia parte no husi Timor-Leste, ne’ebé sei responsabiliza hodi avalia oportunidade hothotu ba promosaun no dezenvolvimentu konjunta husi turizmu entre ami-nia nasaun rua”, nia dehan.
Kalikemala hatutan katak Angola hakarak hametin promosaun nasaun nian hanesan destinu turístiku iha rejiaun CPLP nia laran no aproveita lia-portugés hanesan instrumentu ba formasaun profisionál iha setór referidu.
“Tanba ita hotu ko’alia lian hanesan, fásil liu atu dezenvolve formasaun forsa traballu iha setór turizmu, nune’e habelar baze empregu ne’ebé turizmu bele hamosu iha ita idaidak nia nasaun”, nia salienta.
Reuniaun Ministru Turizmu CPLP nian ba da-13 halibur reprezentante sira husi Estadu-membru sira hodi diskute kona-ba maneira sira atu promove turizmu sustentavel bazeia ba valorizasaun patrimóniu naturál, kulturál, no oseániku husi nasaun sira komunidade nian.
Jornalista: Arminda Fonseca
Editora: Maria Auxiliadora
