TL termina ASEAN Hyundai Cup 2026 ho derrota 0-3 hasoru Indonézia
Dili, 31 Jullu 2026 (TATOLI)–Seleasaun Nasionál Futeból Timor-Leste (TL) termina sira-nia jogu iha ASEAN Hyundai Cup 2026 ho rezultadu la favoravel, sofre derrota 0-3 kontra Indonézia.
Golu vitória Indonézia nian marka husi Shayne Pattynama iha minutu 74′, Thom Haye iha minutu 78′, no Mitchell Lee Baker iha minutu 81′.
Maski jogadór Timor-Leste esforsu to’o finál, maibé defeza la konsege impede presaun husi Indonézia iha minutu ikus nia laran.
Derrota kontra Indonézia ne’e sai derrota datoluk ba Timor-Leste iha faze grupu A nian.
Iha jogu dahuluk, Seleasaun Nasionál sofre derrota boot ho skor 0-7 hasoru Vietname. Nune’e mós iha jogu daruak, Timor-Leste lakon tan ho rezultadu 0-2 hasoru Singapura.
Ho rezultadu derrota datoluk ne’e, Timor-Leste termina Hyundai Cup 2026 iha baze klasifikasaun Group A no la konsege avansa ba faze tuirmai.
Rezultadu ne’e hatudu dezafiu boot ne’ebé Seleasaun Nasionál hasoru iha kompetisaun nivel ASEAN.
FFTL no korpu tékniku presiza halo avaliasaun kle’an ba preparasaun, kondisaun fízika jogadór no estratéjia jogu nian hodi hadi’a iha torneiu sira tuirmai.
Maski nune’e, partisipasaun iha ASEAN Hyundai Cup 2026 ne’e esperiénsia importante ida ba jogadór joven sira atu aprende no dezenvolve an ba kompetisaun internasionál.
Jornalista: Hortêncio Sanchez
Editór: Xisto Freitas da Piedade
