Salazar manán DIT 63-35 iha Liga Basketeból mane
DILI, 01 Agostu 2026 (TATOLI)–Ekipa Salazar domina jogu husi hahú to’o ramata no konsege manán ho skor 63-35 hasoru DIT BC iha jogu Liga Basketeból Nasionál Timor-Leste (LNBTL) mane, ne’ebé hala’o iha Jináziu Dili, Sábadu meiudia ne’e.
Hahú husi kuarter dahuluk, Salazar hatudu disiplina aas iha defiza no efisiente iha atake. Diferensa pontu hahú luan no DIT BC susar atu atinje ritmu jogu ekipa adversária nian.
Durante jogu tomak, árbitru sira marka sinál barak ne’ebé afeta rítmu jogu ekipa rua nian.
Salazar konsege jere di’ak situasaun foul trouble no mantein sira-nia konsentrasaun. Sira aproveita lansa livre ho di’ak no konsege kaptura bola rebounde barak iha área.
Enkuantu DIT BC hasoru dezafiu tanba jogadór importante balu hetan foul no tenke sai husi jogu sedu. Ne’e halo rotasaun ekipa nian sai fraku no fó vantajen ba Salazar atu aumenta sira-nia pontu beibeik.
To’o kuarter ikus, Salazar kontinua kontrola jogu no termina ho vitória esmagadora 63-35.
Vitória ne’e importante tebes ba Salazar hodi hametin sira-nia pozisaun iha topu klasamentu Liga Basketeból mane. Organizasaun jogu ne’ebé di’ak, pasajen ne’ebé loos, no tiru husi li’ur ne’ebé efisiente sai xave ba sira-nia susesu.
Ba DIT BC, derrota ne’e sai liisaun atu hadi’a sira-nia defiza, kontrola foul, no aumenta mentalidade jogu nian ba jogu sira tuirmai.
Jornalista: Hortêncio Sanchez
Editór: Xisto Freitas da Piedade
