St. António Manatutu vense Alligators ho 69-12 iha Liga Basketeból Feminina
DILI, 01 Agostu 2026 (TATOLI)–Ekipa St. António Manatutu domina totál jogu no konsege manán boot hasoru Alligators ho skor 69-12 iha jogu Liga Basketeból Nasionál Timor-Leste (LBNTL) Feminina ne’ebé hala’o iha Jináziu Dili, Sábadu meiudia.
Iha jogu ne’e, jogadór sira husi St. António Manatutu hatudu prestasaun ne’ebé di’akliu hahú husi kuartu dahuluk to’o finál. Atake no defensiva ekipa uma-na’in nian la fó espasu ba Alligators atu dezenvolve sira nia jogu.
St. António Manatuto hahú jogu ho ritmu aas no konsege loke diferensa pontu boot iha kuartu 1 no kuartu 2. Organizasaun jogu ne’ebé di’ak no pasajen ne’ebé loos fasilita jogadór sira atu marka pontu beibeik.
Alligators esforsu atu hamate jogu no buka pontu, maibé hasoru St. António nia jogadór sira halo blokeia ne’ebé metin no agresivu.
To’o jogu ramata, St. António Manatutu termina ho vitória esmagadora 69-12 no konfirma sira-nia superioridade iha kompetisaun ne’e.
Rezultadu ne’e sai vitória importante ida ba St. António Manatutu hodi kontinua luta ba topu klasamentu Liga Basketeból Feminina nian.
Enkuantu ba Alligators, derrota ne’e sai lisaun hodi hadi’a tan sira-nia preparasaun no mentalidade jogu nian ba jogu sira tuirmai.
Jogu ne’e mós hatudu kreximentu basketeból feminina, ho partisipasaun joven feto sira-ne’ebé hatudu espíritu kompetisaun no serbisu ekipa.
Jornalista: Hortêncio Sanchez
Editór: Xisto Freitas da Piedade
