BCTL bolu instituisaun finanseira sira hametin seguransa sibernétika
DILI, 03 Agostu 2026 (TATOLI)- Banku Sentrál Timor-Leste (BCTL, sigla portugés) bolu banku no instituisaun finanseira atu hametin sistema seguransa dijitál no aumenta vijilánsia hasoru ameasa atake sibernétika sira husi ema deskoñesidu.
Governadór BCTL, Helder Lopes, hatete katak maski BCTL labele ko’alia kona-ba sistema seguransa ba fraude ein jerál, banku no instituisaun finanseira idaidak tenke iha resonsabilidade hodi garante sistema ne’ebé rigór hodi proteje husi atake sibernétika.
“Hau mós alerta ona ba instituisaun finanseira, liuliu banku sira iha ne’e katak labele fó biban para ema bele tama hodi uza fali imi-nian servisu finanseiru atu halo atividade ilísita sira ne’e. Lei no Estadu la autoriza. Banku Sentrál tanba jere sistema finanseiru, ami tau muru ida forte hodi proteje sistema ne’ebé ita jere”, Helder Lopes hateten iha Ministériu Finansa, ohin.
Nia salienta katak instituisaun finanseira sira tenke investe iha sistema seguransa, tanba ho dezenvolvimentu teknolojia ohin loron aumenta mós risku ba fraude no atake sibernétika.
“Liga ba sira seluk-seluk ne’e ami labele hatene, tanba karik scamming ka buat ruma ne’ebé tama liuhusi sistema finanseiru ita bele kapta. Se sees husi sistema difísil mai ita atu tama. Scamming ho atake sibernétika ne’e diferente, ne’ebé atake sibernétika ita halo sistema ne’e rigór, forte, para ema labele atake”, afirma.
Notísia relevante: Seguransa Sibernétika – Investimentu Estratéjiku ba Futuru Dijitál Timor-Leste
Jornalista: Arminda Fonseca
Editora: Maria Auxiliadora
