MTK aprezenta planu konstrusaun terminál ‘interchange’ iha Vikeke
VIKEKE, 03 Agostu 2026 (TATOLI)—Diretór Diresaun Nasionál Transporte Terrestre (DNTT) Munisípiu Vikeke, Saul Henrique, informa Ministériu Transporte no Komunikasaun (MTK) aprezenta planu konstrusaun terminál modelu interchange (fatin tránzitu pasajeiru) ba Autoridade Munisípiu Vikeke.
“Kona-ba planu konstrusaun terminál ita planu ona no ita aprezenta ona ba Autoridade Munisípiu Vikeke hodi konstrui terminál interchange. Modelu ne’e la’ós boot hanesan terminál sira, maibé ida-ne’e ita konstrui sanitária ida no fatin administrasaun ida, uza estrada ida parte Jardín 59 Vikeke Vila nian atu fasilita ita-nia transporte públiku hanesan bus tula pasajeiru no hatuun pasajeru mínimu tansporte sira para la to’o minutu 20. Tula tiha pasajeiru ne’e sai ona no hatun hotu pasajeiru tenke sai falifali,” Saul Henrique ba TATOLI iha Postu Vikeke Vila, Segunda ne’e.
Diretór DNTT Munisípiu Vikeke ne’e hatutan, ba konstrusaun terminál interchange ekipa sira sei fahe ba faze tolu mak hanesan estudu viabilidade, master plan no dezeñu detalladu hafoin tama ba faze implementasaun.
“Ita sei liuhusi faze tolu mak foin implementa. Antes ne’e, ekipa sira halo uluk survey fatin sira no fatin ne’ebé sai sentru ba terminál interchange mak iha Jardín 59 nian. Tuir planu ne’e, konstrusaun iha tinan oin (2027). Kona-ba orsamentu ba konstrusaun ha’u seidauk hatene loloos. Governu no Asian Development Bank (ADB) mak sei deside,” Saul esplika.
Nia haktuir durante tinan barak Munisípiu Vikeke laiha fatin terminál ruma hodi fasilita transporte públiku sira parajen iha fatin ida no transporte públiku tama Vikeke konforme kondutór sira para.
Iha fatin ketak, Prezidente Autoridade Munisípiu Vikeke, Francisco C. S. de G. Soares, hato’o agradesimentu ba Governu liuhusi Ministériu Transporte no Komunikasaun hamutuk ho parseiru dezenvovimentu (ADB) ba planu konstrusaun terminál interchange ne’e.
“Ami kontinua koopera no servisu hamutuk ho parte relevante hodi lori dezenvolvimentu mai iha Vikeke. Importante maka fatin ne’e tenke apropriadu no asesivel ba ema hotu,” nia tenik.
Jornalista: Vitorino Lopes da Costa
Editór: Xisto Freitas da Piedade
