Reprezentante Vatikanu Cardeal Peter Turkson vizita AMRT no elojia istória rezisténsia
DÍLI, 03 Agostu 2026 (TATOLI) – Reprezentante Vatikanu Kardeal Peter Kodwo Appiah Turkson hala’o vizita ofisiál ba Arkivu no Muzeu Rezisténsia Timorense, Institutu Públiku (AMRT, I.P.), ne’ebé simu diretamente husi Diretór Ezekutivu AMRT, Jorge Alves “We-Moris”, hamutuk ho ekipa xefia no funsionáriu sira.
Durante vizita ne’e, Cardeal Turkson observa dokumentu, arkivu no fotografia sira kona-ba stória luta rezisténsia no libertasaun nasionál Timor-Leste nian.
Nia hato’o apresiasaun boot ba povu Timorense nia korajen no perseveransa durante tempu okupasaun, no subliña katak prezervasaun istória no memória rezisténsia importante la’ós de’it ba jerasaun foun iha Timor-Leste atu hatene sira-nia abut, maibé mós sai testemuñu ba komunidade internasionál kona-ba valor justisa, direitus umanus no dame.
“Memória no istória husi pasadu mak sai dalan atu harii futuru ida ne’ebé dame no metin,” dehan Kardeal Turkson.
Vizita ne’e mós reforsa relasaun ne’ebé metin entre Santa Sé no Timor-Leste, no hanoin fila-fali papél importante Igreja Katólika nian durante períodu luta libertasaun.
Diretór Ezekutivu AMRT, Jorge Alves, konsidera vizita Kardeal Turkson nu’udar momentu istóriku ba instituisaun ne’e.
Nia dehan reprezentante Santa Sé tama ba “uma sagradu rezisténsia Timorense nian”, fatin ne’ebé rai no prezerva memória povu ida ne’ebé hetan sofrimentu, maibé la rende.
Nia hato’o agradesimentu ba Kardeal Turkson nia prezensa no reafirma katak Igreja Katólika iha kontribuisaun boot iha prosesu luta ba ukun-rasik-an.
“AMRT la’ós de’it fatin atu rai dokumentu no objetu istóriku sira, maibé mós santuáriu memória povu nian ne’ebé hanorin jerasaun foun kona-ba sakrifísiu no valor luta ba independénsia,” dehan Jorge Alves.
Nia akresenta katak vizita husi reprezentante Santa Sé fó kbiit espirituál no apoiu morál ba AMRT atu kontinua halibur, jere no fahe istória loos ba públiku no komunidade internasionál.
Jorge Alves rekoñese papél Igreja Katólika durante tempu okupasaun. Tuir nia, bainhira ema barak labele ko’alia, Igreja maka ko’alia; bainhira povu hetan perseguisaun, Igreja loke nia odamatan hodi fó refújiu, konsellu, protesaun no esperansa ba família sira.
“Luta ba libertasaun Timor-Leste labele konta sein rekoñese papél importante Igreja Katólika nian,” nia dehan.
Molok konklui ninia vizita, Kardeal Turkson hakerek mensajen ida iha livru bainaka AMRT. Nia hakerek katak vizita ida-ne’e mak nia vizita dahuluk ba Timor-Leste, no nia mai ho admirasaun, umildade no respeitu boot ba erói, mártir no povu Timorense hotu.
Nia mós halo orasaun atu Maromak fó dame, liberdade, prosperidade no espíritu fraternidade ba Timor-Leste, no fó bensaun ba Governu no povu tomak.
Jornalist: Camilio de Sousa
Editór: Filomeno Martins
