Pedidu alterasaun orsamentál husi instituisaun sira ultrapasa limite vaga forsa traballu – KFP
DILI, 04 Agostu 2026 (TATOLI) – Komisaun Funsaun Públika (KFP) halo esklaresimentu kona-ba pedidu alterasaun orsamentu husi instituisaun 19 hodi reforsa rúbrika saláriu no vensimentu ho montante totál $10.769.664,23.
Prezidente Komisaun Funsaun Públika ein ezersísiu, José Telo Soares, hateten tuir Mapa Forsa Traballu ba tinan 2026, ne’ebé aprova iha tinan kotuk, bazeia ba opsaun II, neʼebé hetan aprovasaun husi Primeiru-Ministru, limite kontratasaun neʼebé aprova kompostu husi asesór internasionál hamutuk 740, asesór nasionál 202 no traballadór kazuál 15.720.
”Hafoin halo análize ba pedidu alterasaun orsamentál sira-ne’e, konklui katak proposta reforsu ba rúbrika saláriu no vensimentu implika aumentu númeru traballadór ne’ebé ultrapasa limite vaga aprovada iha Mapa Forsa Traballu ba tinan 2026”, refere dokumentu ne’ebé Tatoli asesu, ohin.
Tuir dispozisaun iha artigu 4.º, n.º 2, Dekretu-Lei n.º 41/2025, loron 15 fulan-Dezembru, alterasaun orsamentál ne’ebé destina atu reforsa kategoria saláriu no vensimentu presiza autorizasaun husi KFP no Ministériu Finansa.
Maibé, husi perspetiva jestaun forsa traballu pedidu alterasaun orsamentál sira-ne’e ultrapasa limite ne’ebé aprova ona.
Tuir nia, hasoru situasaun ne’e, KFP hola ona providensia nesesária sira, inklui halo diskusaun ho ekipa Ministériu Finansa iha loron 20 fulan-Jullu 2026, hodi propoin katak asuntu ne’e tenke hato’o filafali ba Konsellu Ministru atu hetan apresiasaun no desizaun.
Nune’e, iha ámbitu aprezentasaun proposta rezolusaun Governu kona-ba suspensaun rekrutamentu no kontratasaun iha setór públiku, pedidu alterasaun orsamentál husi liña ministeriál sira hato’o mós ba Konsellu Ministru. Maibé, pedidu reforsu orsamentál ne’e la hetan autorizasaun.
Konsellu Ministru autoriza de’it instituisaun sira atu halo reajustamentu no jestaun interna iha kategoria saláriu no vensimentu laran, hodi asegura kontinuidade no funsionamentu serbisu institusionál, inklui atu kumpre obrigasaun finanseira neʼebé legalmente estabelese no relasiona ho direitu funsionáriu sira-nian.
Nia hatutan obrigasaun hirak-ne’e bele inklui pagamentu retroativu ba eskalaun salariál, promosaun, subsídiu ka suplementu seluk neʼebé determina ona tuir lei, maibé seidauk selu iha periodu sira liuba tanba limitasaun orsamentál.
Ho nune’e, KFP hato’o filafali informasaun ne’e ba liña ministeriál no instituisaun sira, atu halo reajustamentu no jestaun interna tuir verba disponivel iha saláriu no vensimentu, hodi mantein kontinuidade no funsionamentu servisu, tuir desizaun neʼebé Konsellu Ministru foti iha loron 29 fulan-Jullu 2026.
TATOLI
