Timor-Leste no Singapura reafirma atu esplora oportunidade iha interese komun nian
DILI, 04 Agostu 2026 (TATOLI)- Ministru Prezidénsia Konsellu Ministrus, Agio Pereira, hala’o sorumutu kortézia ho Embaixadora Singapura iha Timor-Leste, Teo Lay Cheng, hodi reafirma forsa relasaun bilaterál entre Timor-Leste no Singapura no atu esplora oportunidade foun sira iha área sira interese komun nian.
Ministru Prezidénsia Konsellu Ministru, Agio Pereira, informa sira ko’alia kona-ba oportunidade atu aprofunda kolaborasaun bilaterál iha área interese komun hanesan dezenvolvimentu sustentável, kapasitasaun institusionál, formasaun rekursu umanu, inovasaun, modernizasaun Estadu no dezenvolvimentu ekonómiku.
“Iimportánsia husi relasaun ho parseiru internasionál sira-ne’ebé fahe vizaun hodi promove dezenvolvimentu no hametin kapasidade nasionál sira, hodi destaka esperiénsia Singapura nian iha governasaun, teknolojia, inovasaun, no dezenvolvimentu abilidade sira,” Ministru Agio Pereira hateten liuhusi nota ne’ebé Agência Tatoli asesu iha portál Governu, ohin.
Enkuantu durante reuniaun ne’e parte rua mós troka perspetiva sira kona-ba oportunidade sira iha kooperasaun nian iha setór enerjétiku, ho énfaze iha jestaun sustentável husi rekursu naturál sira no kriasaun husi valór nasionál.
Iha enkontru ne’e, diskute mós kona-ba dezafiu rejionál nian no globál sira-ne’ebé ezije kooperasaun internasionál ne’ebé boot-liu.
“Timor-Leste nia interese atu kontinua hetan benefísiu husi esperiénsia Singapura nian, partikularmente iha reforsu kapasidade institusionál sira, prepara ba jerasaun foun sira no dezenvolve abilidade sira hodi hasoru dezafiu sira iha future,” nia dehan.
Enkontru ne’e akontese iha kontestu ida-ne’ebé mak aumenta aproximasaun entre nasaun rua ne’e. Singapura loke embaixada rezidente ida iha Dili iha Abril 2024, no Teo Lay Cheng aprezenta ninia kredensiál sira ba Prezidente Repúblika, José Ramos-Horta iha Abril 2026.
Jornalista : Alexandra da Costa
Editór : Cancio Ximenes
