Eventu “Municipal War” loke oportunidade ba atleta boxe amadór sira iha Timor-Leste
DILI, 05 Agostu 2026 (TATOLI) – Klube Revolta kolabora ho Empreza Telemor atu sai patrosinadór ba eventu boxe amadór ho naran “Municipal War”, ne’ebé sei realiza iha fulan-Setembru 2026.
Eventu boxe amadór ne’e hodi fornese plataforma ida ba atleta talentozu husi munisípiu oioin iha Timor-Leste hodi dezenvolve sira-nia abilidade no loke oportunidade atu kompete iha eventu internasionál sira.
Diretór Klubu Revolta, Xander Maria Almeida Serrano, hatete torneiu ne’e nu’udar evolusaun husi kompetisaun sira antes ne’ebé foka liu ba boxe profisionál. Iha tempu ida-ne’e, organizadór sira fó prioridade ba dezenvolvimentu atleta amadór sira husi munisípiu sira, nune’e boxista rejionál barak liután iha oportunidade atu hatudu sira-nia talentu.
“Ami hakarak hetan atleta talentozu sira husi munisípiu idaidak. Iha nafatin boxista barak ho potensiál ne’ebé seidauk hetan oportunidade hodi kompete. Tanba ne’e maka ami hakarak fornese plataforma ida ba sira”, Xander Serrano hateten iha asinatura akordu entre Revolta Club no Telemor, iha Timor Plaza, ohin.
Nia esplika katak Municipal War sei dura maizumenus fulan haat to’o lima no, tuir planu, sei hahú iha Setembru 2026. Jogu sira sei hala’o kada semana rua, ho formatu kompetisaun intermunisipál, no sei hala’o iha área oioin iha lorosae no loromonu.
Tuir nia, atleta hamutuk 100 husi munisípiu sanulu mak sai alvu atu partisipa iha torneiu ne’e. Maski organizadór sira hein katak munisípiu hothotu iha Timor-Leste sei partisipa, maibé iha de’it sanulu maka espresa prontidaun ba eventu inaugurál ne’e.
Tuir Xander, munisípiu ne’ebé sai kampeonatu sei iha oportunidade atu tuir kompetisaun internasionál hasoru atleta husi Indonézia.
Nia hatutan katak atleta hotu bele partisipa iha kompetisaun ne’e ho gratuita. Revolta no Telemor mós la halo diferensa entre kategoria juniór no seniór, tanba objetivu prinsipál kompetisaun ne’e mak atu deskobre atleta talentozu no dezenvolve sira-nia mentalidade kompetitiva.
“Ami la’ós de’it hakarak hadi’a atleta sira-nia abilidade téknika, maibé mós dezenvolve sira-nia mentalidade. Atleta hothotu iha oportunidade hanesan hodi hakat ba ring no hatudu sira-nia abilidade di’ak liu”, nia hatete.
Atu apoia dezenvolvimentu atleta sira, kada munisípiu sei iha treinadór ida ne’ebé responsavel ba selesaun no treinamentu. Ba munisípiu sira ne’ebé sei laiha atleta sira, komisaun fó hela fleksibilidade ba treinadór sira atu rekruta atleta adisionál sira hodi partisipa iha kompetisaun.
Diretór-Jerál Telemor, Vu Duc Nguyen, afirma katak boxe nu’udar desportu ida ne’ebé povu Timór hadomi liu, tanba reflete espíritu, disiplina, determinasaun, no orgullu nasionál.
Nia esplika katak parseria Telemor nian ho Revolta hakarak la’ós de’it apoia torneiu ne’e, maibé mós ajuda deskobre boxista jerasaun foun ne’ebé iha kapasidade hodi fó glória ba Timor-Leste iha palku internasionál.
“Liuhusi parseria ne’e, ami hakarak ajuda deskobre jerasaun talentozu tuirmai ne’ebé bele reprezenta Timor-Leste iha nivel internasionál. Ne’e la’ós de’it kona-ba divertimentu, maibé mós kona-ba kria oportunidade sira no apoia Timor-Leste nia futuru”, katak.
Vu Duc Nguyen mós enkoraja públiku atu asiste jogu hothotu liuhusi app Timor TV, nune’e ema tantu iha rai-laran komu rai-li’ur bele akompaña kada jogu Municipal War nian.
Aleinde tranzmisaun direta husi enkontru sira, ne’ebé hala’o kada semana rua, Timor TV mós sei fó sai programa espesiál loron tolu nian ne’ebé hatudu atleta sira-nia preparasaun no atividade husi klube boxe sira iha Dili.
Rejistu atleta nian loke to’o loron 20 fulan-Agostu, ho serimónia abertura torneiu nian ne’ebé marka ona ba loron 30 fulan-Agostu. Iha momentu ne’ebá, komisaun sei fó sai lista ofisiál atleta sira ne’ebé kompete iha Municipal War.
Jornalista: Arminda Fonseca
Editora: Maria Auxiliadora
