Funsionáriu IJT tuir formasaun kona-ba transformasaun sistema baze dadus
DILI, 05 Agostu 2026 (TATOLI)—Inspetór Jerál Traballu (IJT), Frederico Pereira de Matos, hateten funsionáriu Inspesaun Jerál Traballu tuir formasaun kona-ba transformasaun sistema dijitál baze dadus servisu instituisaun nian ho dijitalizasaun tanba durante ne’e sira uza de’it sistema manuál.
Formasaun ne’e Empreza Elrich Unipessoal, Lda, fasilita hodi fó formasaun ba funsionáriu IJT kona-ba transformasaun dijitál sistema baze dadus atu kapasita servisu funsionamentu institusionál.
“Entaun ho sistema dijitalizasaun ne’e bele promove ami-nia servisu ne’ebé organizadu, fasil bele fornese informasaun ne’ebé detalladu liga ho atividade inspesaun traballu, vistu traballu,” Inspetór Jerál IJT relata ba Agência Tatoli iha nia kna’ar fatin, Hudi Laran, ohin.
Nia afirma, durante uza sistema baze dadus ne’ebé manuál sira sempre hasoru obstákulu barak, entaun ho programa Governu konstitusionál da-sia (IX) ne’ebé prioriza integra servisu ho dijitál bele ajuda tebes sira-nia servisu loro-loron.
“Maske hanesan ita hatene katak integra sistema presiza iha internet ne’ebé di’ak no seguransa ba dadus, maibé se ita hakarak hein internet di’ak bainhira loos mak ita atu moderniza servisu institusioná. Entaun, ami-nia parte kontinua kapasita formasaun no Governu sentrál mak sei haree kona-ba internet,” nia informa.
Aleinde ne’e, nia dehan, sira mós halo ona koordenasaun ho TIC Timor atu garante seguransa dadus, nune’e nia garante servisu hotu sei la’o di’ak tanba Timor-Leste presiza adota sistema modernu.
“Ne’ebé kapasitasaun institusionál la presiza haree ba fasilidade maibé mós haree husi rekursu umanu. Tanba ne’e ekipa ne’ebé tuir ona formasaun, sei kontinua atualiza fali ba ekipa destakadu sira iha munisípiu. Tanba servisu akumulasaun baze dadus ne’e elabora husi nasionál,” nia esplika.
Tanba ne’e, nia apela ba partisipante sira atu aproveita oportunidade ne’e ho di’ak atu nune’e bele aplika fali iha servisu ho inovativu.
Tuir formadór no atuál Diretór Elrich Unipesoál, Lda, Acácio Sarmento, hateten formasaun ne’e ho objetivu atu fasilita sistema dijitalizasaun baze dadus ba funsionáriu IJT hodi integra iha sira-nia servisu loro-loron.
“Nune’e durante loron lima nia laran sira sei fó matéria kona-ba kobbo toolbox, power BI, cloud google drive, excel avansadu (pivot), dashboard excel interativu, no fornasaun ne’e barak liu mak iha prátika,” formadór ne’e relata.
Nia hatutan, sira fasilita formasaun de’it ba funsionáriu IJT iha nasionál, enkuantu sira destakadu iha munisípiu ne’e sira sei aprende husi nasionál fali.
Enkuantu partisipante sira-ne’e kompostu husi funsionáriu IJT husi Departamentu oioin ne’ebé servisu relasiona ho rekolla baze dadus no formasaun ne’e sei hala’o durante loron lima.
Jornalista : Alexandra da Costa
Editór : Cancio Ximenes
