Governu halo despeju administrativu ba uma 57 iha Metiaut ba alargamentu estrada
DÍLI, 05 Agostu 2026 (TATOLI) – Governu, liuhusi ekipa konjunta Sekretaria Estadu Asuntu Toponímia no Organizasaun Urbana (SEATOU), no Ministériu Obras Públikas, no Autoridade Munisípiu Díli halo despeju administrativu ba uma hamutuk 57 iha Suku Metiaut, Postu Administrativu Nain Feto, Munisípiu Díli, atu fó espasu ba projetu alargamentu estrada husi Ponte BJ Habibie to’o Kristo Rei.
Xefe Suku Metiaut, Pedro da Silva Barreto, hatete katak molok implementasaun medida ne’e, Governu halo ona diálogu ho komunidade afetada durante fulan rua, hahú husi inísiu Juñu to’o Jullu, atu buka entendimentu no aseitasaun husi komunidade.
Tuir Pedro, komunidade afetada sira mós simu ona notifikasaun husi Governu molok ekipa konjunta SEATOU, Ministériu Obras Públikas (MOP) no Autoridade Munisípiu Díli hala’o despeju administrativu hahú Kuarta.
“Nu’udar autoridade lokál, hau prontu kolabora ho Governu no organiza komunidade atu hamamuk fatin, hodi fó dalan ba Governu atu halo alargamentu estrada,” dehan Pedro ba jornalista sira iha Metiaut, ohin.
Pedro esplika katak maioria uma ne’ebé afetada harii iha rai Estadu. Tanba ne’e, bainhira Governu presiza rai ne’e ba projetu interesse públiku, komunidade tenke kolabora no hamamuk fatin ho voluntariamente.
“Rai ne’e Estadu nian. Tanba ne’e, ita hotu presiza kolabora ho Governu hodi suporta dezenvolvimentu. Hau agradese komunidade sira ne’ebé kolabora di’ak, to’o sobu rasik sira nia uma no muda ba fatin seluk atu kontribui ba dezenvolvimentu nasionál,” nia dehan.
Fatin ne’ebé afetadu ba medida ida-ne’e kompostu husi uma hela fatin, apartamentu, restaurante, hotel, bar no kioske sira, ne’ebé lokaliza iha aldeia tolu iha Suku Metiaut, inklui Aldeia 7 Abril, Aldeia Karmalau no Aldeia Fatukama.
Jornalista: Camilio de Sousa
Editór: Filomeno Martins
