Influensiadora na’in-tolu husi Indonézia sei halo promosaun ba eventu DIM

DILI, 05 Agostu 2026 (TATOLI)—Komisaun Organizadora Eventu Korrida Maratona Internasionál Dili (DIM, sigla inglés) konvida influensiadora na’in-tolu husi Indonézia atu halo promosaun ba DIM, ne’ebé sei realiza iha loron 08 Agostu.

Influensiadora sira ne’e ohin aprezenta aan ba Prezidente Repúblika, José Ramos-Horta. Sira ne’e mak Yasmin Napper, Salwa Anindya no Violetta Wijaya.

Diretór Eventu Korrida DIM , João Borel, hateten sira na’in-tolu ne’e aleinde halo promosaun ba DIM, sei halo mós promosaun ba fatin konservasaun sira iha Timor-Leste, bazeia ba tema DIM tinan ne’e “Hadomi Ita-nia Ai-laran, Hadomi Balada Fuik Sira”.

Prezidente Repúblika, José Ramos-Horta, hatete nia parte kontente tebes ho prezensa husi influensiadora sira, tanba bele promove Timor-Leste ba mundu, liuliu Indonézia.

“Ha’u esplika natureza Timor-Leste ba sira, nomós atividade Maratona Internasionál Dili. Sira kontente mai koñese Timór. Ha’u agradese tebes ba sira, sira mai ho inisiativa nomós konvida husi Komisaun Oragnizadora sira mak halo programa lojístika sira ne’e hotu entaun konvida sira mai”, nia dehan.

Influensiadora Yasmin Napper agradese tanba bele partisipa iha eventu ne’ebé Prezidente Repúblika realiza kada tinan no envolve komunidade no haburas turizmu Timor-Leste.

“Iha ne’e ami sei halo konten vlog ba fatin turizmu sira ne’ebé iha Timor-Leste, tanba gosta tebes ambiente Timor-Leste. Ami mós sei halo vizita bá fatin konservasaun sira iha Timor-Leste hodi haree animál fuik sira”, Yasmin dehan.

Nia parte rasik mai Timor-Leste ba datoluk ona, no haree katak Timór ne’e nia natureza furak loos, sira bele esplora liuhusi sira-nia mídia sosiál sira.

Jornalista: Arminda Fonseca

Editora: Maria Auxiliadora